LA Lakers gibaligya sa record nga $10B

CEBU, Philippines — Ang Los Angeles Lakers gibaligya sa makabungog nga kantidad nga $10 billion sa makapakurat nga transaksiyon naghimo sa inilang prangkisa nga labing bililhon nga sports team sa kasaysayan sa Amerika.

Sigun sa taho sa ESPN kagahapong adlawa, ang pamilyang Buss nga maoy tag-iya sa Lakers mobaligya sa dakong bahin sa ilang koponan ngadto sa bilyonaryong si Mark Walter nga nagkupot nang daan og gamayng porsiyento sa team.

Tungod niini, gibuak sa Lakers ang miaging rekord alang sa labing dako nga presyo sa pagpalit sa usa ka US sports team nga mibalor og $6.1 billion sa dihang gipalit ang Boston Celtics sayo ning tuiga.

Samtang si Jeanie Buss magpadayon isip Lakers governor, ang nasilyohan nilang kasabotan nagtuldok sa 46 ka tuig nga pagdumala sa pamilyang Buss sa Lakers.

Si Walter maoy CEO sa TWG Global nga maoy tag-iya sa pipila ka sports teams apil na ang Los Angeles Dodgers ug Los Angeles Sparks. Kabahin sab siya sa grupo nga nanag-iya sa Chelsea football team sa English Premier League.

Siya sab maoy tag-iya sa Billie Jean King Cup tennis tournament ingon man sa Cadillac Formula One team.

Ang Lakers usa sa labing daogan nga mga teams sa NBA uban ang 17 ka korona sa kampiyonato.

Gipangulohan ni LeBron James, ang Lakers mihimo og kasikas niadtong Pebrero sa dihang ilang nabira si Luka Doncic gikan sa Dallas kuyo sa makapakugang nga trade nga naghatud sa bitoon nilang sentro nga si Anthony Davis ngadto sa Mavericks.

Bisan pa man niini, ang Lakers kutob lamang sa unang hugna sa NBA playoffs ning season human sila gitagak sa Minnesota Timberwolves.