Karong adlawa sa Japan Araneta korona sa IBF ang tirada

CEBU, Philippines — Ang Sugbuanong knockout artist nga si Christian "The Bomb" Araneta sa Omega Gym motikang na sa labing dako nga bantawan sa iyang karera sa dihang iyang sangkaon si Thai power puncher Thanongsak Simsri sa usa ka 12 ka hugna nga kumbati alang sa IBF light flyweight title karong adlawa (Huybes, Hunyo 19) didto sa Ota City General Gymnasium sa Tokyo, Japan.

Isip nag-unang duha ka mga contenders, sila si Araneta ug Simsri maoy naka-angkon sa katungod nga magbugno alang sa bakanting trono human ang Hapon nga si Masamichi Yabuki boluntaryong mihubo sa iyang bakos aron mokampanya sa flyweight division.

Human napakyas sa duha ka IBF title eliminators batok nilang Daniel Valladares sa Mexico ug Sivenathi Nontshinga sa South Africa, mitugdon na gyud sa mga palad ni Araneta ang bulawanong oportunidad nga maka-away alang sa kalibutanhong korona.

Ug ang kapildihan dili opsiyon alang sa 30-anyos nga garbo sa dakbayan sa Mandaue.

"Nabuhat namo ang tanan nga angay buhaton gikan sa training, game plan, cut weight ug recovery. I have a good team behind me. A win is a must," dason pa ni Araneta.

"Hinaut nga suportaan ko sa akong mga kababayan labi na sa mga taga-Cebu to pray for me nga makuha nako ang kadaogan para sa ako pamilya, sa ako team, ug sa Pilipinas," dugang pa niya.

Si Araneta nagkupot og 25-2 rekord uban ang 20KOs samtang si Simsri nagtangag og 38-1 nga baraha uban ang 34KOs.

Kon ugaling modaog, si Araneta mamahimong ikatulong Pinoy world champion ning tuiga sunod nilang Melvin "El Gringo" Jerusalem ug Pedro Taduran nga naghari karon sa WBC ug IBF minimumweight class.