Coach Mike Reyes moabli og bag-ong panid sa iyang karera uban sa FEU Tamaraws

CEBU, Philippines — Si coach Mike Reyes mosagubang og bag-ong hagit sa masilakon niyang karera human siya gitudlo nga program director for basketball sa Far Eastern University (FEU) sa UAAP.

Sa usa ka post sa social media niadtong Martes, Hunyo 17, ang FEU mipahibawo nga si Reyes na maoy modala sa ilang 19 Under ug 16 Under teams samtang makigtambayayong siya ni Tamaraws coach Sean Chambers sa pagpalambo sa ilang mga atleta gikan sa junior high school ngadto sa kolehiyo.

"A former Baby Tamaraw, Coach Mike will now be tasked to take the reins of the UAAP Boys 19 and Boys 16 basketball teams as well as work hand in hand with Coach Sean Chambers to ensure a consistent approach in developing student-athletes from Junior High School to College," matud pa sa FEU sa usa ka opisyal nga pamahayag.

“Mike Reyes is extremely accomplished in his work with youth athletes having won championships in the UAAP and the CESAFI. He brings his constraints-led coaching philosophy to the FEU basketball program.”

Si Reyes, nga igsoon ni TNT Tropang 5G head coach Chot Reyes, nagbitbit og impresibong kredensiyal

Nagsilbe siyang assistant coach sa Pampanga Dragons ug head coach sa Iloilo Volts niadtong panahon sa Metropolitan Basketball Association (MBA) sa wala pa mohimo og pangan sa Cebu sports isip sinaligan nga assists coach ni anhing Yayoy Alcoseba uban sa M. Lhuillier Kwarta Padala Jewelers diin sila nakadaog og daghan kaayong kampiyonato sa mga lokal ingon man nasudnong liga duha ka dekada na ang milabay.

Nakakupot sab si coach Mike sa University of San Carlos (USC) Warriors sa wala pa siya maghiusa og balik ni Alcoseba sa Southwestern University (SWU)-Phinma Cobras diin sila nakasakmit na sab og korona atol sa 2012 season sa Cebu Schools Athletic Foundation, Inc. (CESAFI).

Pito ka tuig ang milabay, si Reyes migiya sa Cobras ngadto sa kampiyonato sa CESAFI aron sementohon ang iyang estado isip usa sa labing bangiitan nga mga coaches sa primerong inter-school nga liga sa Sugbo. Taliwala sa pandemiya niadtong 2021, si Reyes mitimon sa KCS Computer Specialist–Mandaue City ngadto sa Visayas leg title sa Pilipinas VisMin Super Cup.

Naka-coach siya kadiyot sa Cebu Classic sa Maharlika Pilipinas Basketball League (MPBL) ning season sa wala mobiya sa team nga gitay-og sa problemang pinansiyal. Miabot dayon ning oportunidad nga makaserbisyo siya sa pinangga niyang tunghaan.