Batch 2015 4-0 na sa SHAABAA Season 28

CEBU, Philippines — Si Janjan Jaboneta miharos og 31 puntos, 16 ka rebounds, duha ka assists ug usa ka steal sa dihang ang Imperial House Furniture Batch 2015 mipayaka sa FADI Batch 2021, 86-70, aron pagpabiling way pilde sa Sacred Heart Ateneo Alumni Basketball Athletic Association (SHAABAA) Season 28 niadtong Domingo, Hunyo 15, didto sa Magis Eagles Arena sa Barangay Canduman, dakbayansa Mandaue.

Si Anton Bennett Chua midugang og 14 puntos, walo ka rebounds ug usa ka steal samtang ang sangay niyang si Anton Nino Araw-araw miamot og 11 puntos, upat ka rebounds, duha ka assists ug usa ka steal alang sa Batch 2015, nga nakigsawo na karon sa liderato sa Division C uban sa Xchange Forex Batch 2018 bitbit ang managsamang 4-0 rekords.

Sa Division B, ang ZLREJ Trading and Construction Batch 2010 ug ang Knox Steel Batch 2007 midemolis sa ilang mga karibal, samtang ang Onses Batch 2011 nagmadaogon sab aron pagmugna og triple-tie tali kanila uban ang parehong 4-2 nga baraha.

Sila si Jonathan Cimafranca ug Dellbert Tan nagkumboya'g 36 puntos, siyam ka rebounds, walo ka assists ug duha ka steals samtang si Gabe Branzuela mipupo og 17 puntos, 10 ka rebounds, siyam ka assists ug upat ka steals sa dihang gilampornas sa Batch 2010 ang Magis Medical Funds, 97-40.

Sila si Joshua Belarmino ug Ralph Dira adunay tinigum nga 23 puntos samtang si Jasper Diaz nalimitahan sa nuybe puntos apan bangis sa depensa uban ang 17 ka rebounds alang sa Batch 2010.

Ang Batch 2007 milansang sa ikaupat nilang daog human gikulata ang  Golden Dragons Batch 2012, 85-38.

Si Niel Benedicto maoy nangu sa Batch 2007 uban ang 17 puntos, 10 ka rebounds, upat ka steals, usa ka assist ug usa ka  block. Nakaangkon siya og igong suporta gikan nilang Jan Michael Jaca nga mihipos og 14 puntos, tulo ka rebounds ug tulo ka steals ug Karl De Pio nga miposte og 12 puntos, 12 ka rebounds ug duha ka steals.

Sa laing bahin, si Karlo Sibi mipabuto og 26 puntos, si Vann Alicias mi-iskor og 19 samtang si Kiefer Lim mitimbre og 15 puntos, 13 ka rebounds, siyam ka assists ug tulo ka steals aron ituboy ang Batch 2011 ngadto sa 87-70 nga pagpakaging sa 2kcares.org.

Si Elddie Cabahug mikuha sab og atensiyon human mipatuasik og 35 puntos uban ang duha ka rebounds ug tulo ka assists sa dihang gilampaso sa Insular Square Batch 2005 ang Core Pacific Group, 86-66, aron padayong magsolo sa ikaduhang puwesto uban ang 5-1 nga marka.  Si Cabahug gipaluyohan ni Daryle Tan nga mikabkab og 24 puntos, pito ka rebouunds, upat ka assists ug duha ka two steals.

Sa laing resulta, si Alexter Dan Tan mikadlit og 19 puntos, si Simon Guanzon mibulsa og 15 puntos samtang si Julius Cadavis mikimada og 14 puntos ug 11 ka rebounds sa dihang ang Harley Davidson Batch 2012 miinat sa ilang rekord ngadto sa 4-3 human nakaipsot sa Subtero Batch 2006, 67-65.