Trainer ni Araneta Masaligon sa kadaugan

Ang kampo ni Christian "The Bomb" Araneta sa Omega Boxing Gym sa Sugbo masaligon kaayo sa iyang tsansa batok ni Thai Thanongsak Simsri sa kulbahinam nga sangka tali sa duha ka eksplosibong boksidor alang sa IBF light flyweight belt karong Huybes, Hunyo 19, didto sa Ota City General Gymnasium sa Tokyo, Japan.

Isip nag-unang duha ka mga contenders, sila si Araneta ug Simsri maoy naka-angkon sa katungod nga mag-ilog sa bakanting korona human ang Hapon nga si Masamichi Yabuki boluntaryong mikanaog sa iyang trono aron mokampanya sa flyweight division.

Si Araneta nagbitbit og 25-2 record uban ang 20 ka knockouts samtang si Simsri impresibo sab kay kausa lamang mapilde sa 39 ka away uban ang 34KOs.

Taas ang kompiyansa ni Omega Gym head trainer Julius Erving Junco nga ang garbo sa dakbayan sa Mandaue magmalalampuson sa una niining pagsuway alang sa kalibutanhong titulo.

"Dako og chance si Araneta tungod sa iyang abilidad, kusog ug kaisog," dason pa ni Junco. "Maningkamot mi nga makuha ang bakus para sa pamilya namo ug para sa mga Sugbuanon."

Kon ugaling modaog, ang 30-anyos nga si Araneta mamahimong ikaupat nga Pinoy world champion ning tuiga sunod nilang minimumweights Melvin "El Gringo" Jerusalem (WBC) ug Pedro Taduran (IBF) ug Nonito Donaire Jr., nga miskamit sa

WBA interim bantamweight title human midaog pinaagi sa technical decision sa ikasiyam nga hugna batok ni Andres Campos sa Chile niadto lamang Domingo, Hunyo 15.

Malisud hinoon nga tahas ang sagubangon ni Araneta gumikan kay ang 24-anyos nga si Simsri nailhan man nga  mamumuno og mga Pinoy diin ang kanhi OPBF champions nga sila si Miel "Silent Assassin" Fajardo ug John Paul "Angas ng Cebu" Gabunilas naglangkob sa notado niyang mga biktima.