Hotshots garantisado nang twice-to-beat sa PBA playoffs
CEBU, Philippines — Ang Magnolia Hotshots mipiog sa TNT Tropang 5G, 88-83, aron pag-angkon og luna sa Top 4 sa PBA Philippine Cup didto sa Ninoy Aquino Stadium sa kaulohan niadtong Biyernes sa gabii.
Sila si Rome de la Rosa, Zavi Lucero, Rafi Reavis ug Aris Dionisio nagtambayayong paglusad og krusyal nga 16-0 rally nga nakahatag sa Hotshots og 13 puntos nga labaw sa katapusang kuwarter.
Wala na molingi pa sukad niadto ang Hotshots aron tuldokan ang ilang kampanya sa eliminasyon uban ang 8-3 rekord nga nagseguro kanila og twice-to-beat advantage sa quarterfinals.
Si Lucero mikadlit og 24 puntos samtang sila si William Navarro ug Mark Barroca nagkumbinar og 24 puntos aron tabangan ang Hotshots pagpakgang sa duha ka sagunson nilang pilde batok sa Barangay Ginebra ug NLEX.
Samtang ang TNT natagak sa 6-5 ug wala nay tsansa nga maapil sa Magic Four. Buhi pa hinoon ang misyon sa Tropang 5G nga maka-grand slam apan kinahanglan nilang pildihon sud sa duha ka higayon kon kinsa man gani ang ilang makaatbang sa playoffs.
- Latest
