Game 3 sa NBA Finals Thunder, Pacers buk-on ang ilang panagtabla

CEBU, Philippines — Magkumbati na sab ang Oklahoma City Thunder ug ang Indiana Pacers, ning higayona alang sa labaw sa serye sa Game 3 sa best-of-seven NBA Finals nga molabyog didto sa Gainbridge Fieldhouse sa Indaianapolis, Indiana karong adlawa (Huybes, Hunyo 12 oras dinhi sa Pilipinas).

Mabangga ang duha ka puwersa sa alas 8:30 sa buntag.

Ang Pacers mipakurat sa Thunder, 110-109, sa pasiunang duwa sa serye.

Apan nakabawos dayon ang Thunder human gilampaso ang Pacers, 123-107, sa Game 2 niadtong Lunes, Hunyo 9.

Kay adto sa ilang korte ang duwa, seguradong makakuha og dugang motibasyon ang Pacers sa ilang tinguha nga makalabaw og balik sa serye.   

Aron kini nila makab-ot, kinahanglan nga manginit og balik ang alas nilang si Tyrese Haliburton, nga namugnaw og nalimitahan ngadto sa 17 puntos sa Game 2.

Si Haliburton mihipos lamang si og singko puntos sa nag-unang tulo ka kuwarter. Mibubo man tuod siya og 12 puntos sa pinal nga kuwarter apan uwahi na ang tanan kay ang Thunder nakabuylo na ngadto sa impresibong kadaogan.

Isip lider sa ilang koponan, si Haliburton gikinahanglan nga agresibo sa tanang higayon ug obligado nga mopakita og nindot nga duwa sa kanunay.

Gawas niini, ang Pacers kinahanglan nga mangita og epektibong paagi aron kapugngan ang labing sanag nga bitoon sa OKC nga si Shai Gilgeous-Alexander.  Sa ingon makab-ot nila ang ilang misyon ug makahatag sila og kalipay sa ilang mga fans.