Beermen hayag na sa Top 4

CEBU, Philippines — Ang San Miguel Beermen mipiog sa Rain or Shine Elasto Painters, 120-111, sa ilang out-of-town game sa PBA Philippine Cup niadtong Sabado sa gabii didto sa Cagayan de Oro Convention Center.

Si CJ Perez miharos og 33 puntos, walo ka rebounds, pito ka assists ug tulo ka steals samtang si Don Trollano midugang og 24 puntos, upat ka rebounds ug tulo ka steals alang sa Beermen, nga mipalig-on sa ilang nga makasud sa Top 4 nga adunay twice-to-beat incentive sa quarterfinals.

Sa dihang ang E-Painters nakasikit ngadto na lang sa usa ka lugas human malubong og 25 puntos, sila si Perez ug Trollano mipasud sa krusyal nilang mga itsa aron silyohan ang ikapitong daog sa Beermen batok sa duha lamang ka pilde.

Uban ang 7-2 rekord, ang Beermen mipahugot sa ilang pagkupot sa ikaduhang puwesto sunod sa NLEX Road Warriors (8-2) samtang ang Elasto Painters nakigsawo sa ikaunom nga puwesto uban sa Converge FiberXers bitbit ang managsamang 6-4 nga baraha.

Ang Beermen duna pay tsansa nga maangkon ang numero unong puwesto sa playoffs. Ila kining makab-ot kon modaog sila sa katapusan nilang duha ka duwa sa eliminasyon batok sa Converge FiberXers ug NorthPort Batang Pier.