Thunder giunhan ang Wolves

CEBU, Philippines — Si Shai Gilgeous-Alexander mibubo og 20 sa iyang 31 puntos sa second half aron pangulohan ang Oklahoma City Thunder ngadto sa 114-88 nga demolisyon sa Minnesota Timberwolves sa Game 1 sa ilang best-of-seven NBA Western Conference finals kagahapong adlawa didto sa Paycom Center sa OKC.

Kandidato pagka-MVP ning season, si Gilgeous-Alexander mipasa sab og siyam ka assists ug mipasud og walo sa 14 niya ka itsa human sa halftime. Ang Thunder mitikang og balik sa korte duha ka adlaw pa lamang ang milabay sukad nila gitagak ang Denver Nuggets, samtang ang Wolves taas-taas ang pahuway human gipalagapot nila ang Golden State Warriors.

Si Julius Randle maoy nangu sa Wolves uban ang 28 puntos apan mi-iskor lamang og otso puntos sa katapusang duha ka kuwarter.        Ang katumpang niyang si Anthony Edwards, nga mi-average og 26.5 puntos matag duwa sa playoffs, nalimitahan ngadto sa 18 puntos kay naka-igo lamang og lima sa 13 niya ka tira.

Alkansi og kuwatro puntos, 44-48, sa halftime, ang Thunder misikad sa ikatulong kuwarter pinaagi sa eksplosibong 10-0 rally kontrolahon ang duwa sa hingpit.