CEPCA President's Cup 2025 kasado na karong weekend
CEBU, Philippines — Andam na ang tanan alang sa Cebu Executives and Professionals Chess Association (CEPCA) President's Cup 2025 karong Domingo, Mayto 25, diha sa Cebu Chess Club sa Robinsons Galleria Cebu.
Magsugod ang pinug-anay sa utok sa alas 10:30 sa buntag.
Ang tinuig nga dalit ni CEPCA President Engr. Jerry Maratas ngadto sa kauban niyang mga Cepcans atol sa adlaw niyang natawhan abli sa tanan.
Ang makampiyon sa siyam ka hugna nga kompetisyon mobulsa og P10,000, samtang ang mopahiluna sa ikaduha ngadto sa ikapito nga puwesto makadawat og P5,000, P3,000, P2,000, P1,000, P800 ug P700.
Adunay espesyal nga premyo alang niadtong maglangkob sa Top 15 ingon man alang sa Top 2 Cepcan (A ug B), senior, lady, Under 8, Under 12, Under 16 ug Under 20 nga mga partisipante.
Ang rehistrasyon nagkantidad og P300 apan ang mga Cepcans, seniors, PWDs, babaye, ug bata nga nag-edad og 12 anyos paubos hatagan og P100 nga diskwento. Libre nga makaapil ang FIDE titled players.
Kadtong interesado mosalmot mahimong mokontak nilang National Arbiters Kevin Yap (0945-8559800) ug Edwin Cablao (0917-1383181).
- Latest
