OKC Thunder mipalagpot sa Nuggets, makigharong sa Wolves sa West finals

CEBU, Philippines — Si Shai Gilgeous-Alexander mipaulbo og 35 puntos sa dihang gilampaso sa Oklahoma City Thunder ang Denver Nuggets , 125-93, sa tinagakay nga Game 7 sa ilang NBA Western Conference semifinals series kagahapong adlawa didto sa Paycom Center sa OKC.
Gisilyohan sa Thunder ang serye sa baraha nga 4-3 aron pag-abante sa West finals diin ilang sangkaon ang Minnesota Timberwolves sugod karong Miyerules.
Si Gilgeous-Alexander, ang sikit nga karibal ni Nikola Jokic sa Nuggets pagka-MVP ning season, gipaluyohan ni Jalen Williams nga mihipos og 24 puntos.
Ang Nuggets gipangulohan ni Jokic uban ang 20 puntos, siyam ka rebounds ug pito ka assists. Sila si Christian Braun ug Jamal Murray nagkumboya'g 32 puntos sa pilderong kawsa.
Ang Nuggets naglabaw pa unta og 11 puntos sa sayong bahin sa duwa apan si Williams mibubo og 17 puntos sa ikaduhang kuwarter diin gilabhan sa Thunder ang Nuggets, 39-20, aron pagposte og 60-46 nga bentaha sa halftime.
Nagpadayon ang kainit sa Thunder nga sa usa ka higayon miabante og 43 puntos, 125-82, nga nakapabarag sa Nuggets sa hingpit sa pinal nga kuwatro minutos.
- Latest