Duha sa sugbuanon apil sa Gilas Youth U16 Team
CEBU, Philippines — Duha ka mga batan-on ug masaarong Sugbuanon nga basketball players ang naglangkob sa 18-man lineup sa Gilas Pilipinas Youth alang sa FIBA Under 16 Asia Cup SEABA Qualifiers nga gikatakda karong Mayo 24-30 didto sa Bren Z. Guiao Convention Center sa San Fernando, Pampanga.
Kini mao sila si Nickson Andwele Cabañero sa siyudad sa Lapu-Lapu ug Sacred Godwyn Toring sa dakbayan sa Sugbo.
Sul-ot ang uniporme sa University of Santo Tomas (UST) Tiger Cubs, si Cabañero naapil sa Mythical Five sa UAAP Season 87 sa miaging tuig uban ang average nga 16.8 puntos, 9.4 rebounds, 5.5 assists ug 1.7 steals matag duwa. Nakaabot sila sa Finals ugaling lang kay gipilde sa University of the East (UE) Junior Warriors.
Ang 5'11 nga si Cabañero manghud ni UST 'King Tiger' Nic Cabañero. Ang ilang amahan nga si Dominic Cabañero maoy kasamtangang head coach sa University of San Carlos (USC) Baby Warriors Under 15 team. Sa laing bahin, si Toring miyembro sa National University (NU) Nazareth School Bullpups. Ang 6'5" nga big man manghud ni NU Lady Bulldogs volleyball star Sheena Toring.
Ang ilang amahan nga si Sonny Toring kanhi varsity player University of Cebu (UC) Mariners nga milugwa nga kampiyon sa Cebu Amateur Athletic Association (CAAA), nga mao na karon ang Cebu Schools Athletic Foundation, Inc. (CESAFI), niadtong 1998.
Sa umaabot nga SEABA Qualifiers, sila si Cabañero ug Toring morepresenta sa nasud kauban ang pipila ka sumusulbong nga mga bitoon nga gipangulohan nilang Carl Delos Reyes, Brian Orca Jr., Goodluck Okebata ug Jolo Pascual sa UAAP champion UE Junior Warriors.
Anaa sab sa national youth squad sila si Travis Pascual sa Santolan High School, Samuel Esomchi sa La Salle Greenhills, Chris Paul Miranda ug Prince Carino sa Far Eastern University (FEU)-Diliman, John Restificar sa Perpetual Help, Jhustin Hallare sa University of the Philippines Integrated School (UPIS), Jhello Lumague sa Letran, Jeremiah Antolin sa St. Augustine Institute of Pampanga, Everaigne Cruz sa San Sebastian, Ethan Tan-Chi sa Faith Academy, Clark Khobuntin sa NU Nazareth ug Rajver Sidhu sa Lyceum.
Ubos sa paggiya ni coach LA Tenorio, makigharong sila batok sa Vietnam, Malaysia, Indonesia, Singapore ug Thailand sa usa ka semanang torneyo diin ang Top 2 moabante sa FIBA Under 16 Asia Cup didto sa Mongolia sud ning tuiga.
- Latest
