Knicks mipalayas sa Celtics sa ilang trono

CEBU, Philippines —  Makigsangka sa Pacers sa NBA East finals

Ang New York Knicks miabante sa NBA Eastern Conference finals sa unang higayon sud sa 25 ka tuig human gipalayas nila ang Boston Celtics sa ilang trono uban ang impresibong 119-81 kagadaogan sa Game 6 sa ilang best-of-seven semifinals series kagahapong adlawa didto sa Madison Square Garden sa New York City.

Sila si Jalen Brunson ug OG Anunoby mikadlit og 23 puntos matag usa alang sa Knicks, nga mihuman sa serye sa baraha nga 4-2.

Tungod niini, naangkon sa Knicks ang katungod nga makigharong sa Indiana Pacers sa East finals. Ang Game 1 sa ilang best-of-seven series gikatakda karong Huybes didto sa New York.

Tam-is nga kalamposan ang nakab-ot sa Knicks gumikan ka wala naman sila makadaog og usa ka playoff series didto sa ilang korte sukad niadtong 1999 East finals.

Si Mikal Bridges mi-iskor og 22 puntos samtang si Karl-Anthony Towns mitimbre og 21 puntos alang sa Knicks, kansang 38 puntos nilang demolisyon sa Celtics maoy labing dako nilang daog sa usa ka postseason nga duwa.

Dako sab og naambag si Josh Hart nga mikolekta og triple-double nga 10 puntos, 11 ka rebounds ug 11 ka assists alang sa Knicks.

Hayag na kaayo ang resulta sa duwa sa dihang ang Knicks miposte og 27 puntos nga labaw, 64-37, sa halftime.

Si Jaylen Brown mihipos og 20 puntos samtang sila si Al Horford ug Payton Pritchard nagkumboya'g 21 puntos apan ang Celtics nagkagidlay kay wala ang naangol nilang alas nga si Jayson Tatum.