UP Cebu Fighting Maroons gikoronahan nga kampiyon

Naghari sa men's basketball sa SCUAA National Games

CEBU, Philippines — Ang University of the Philippines (UP) Cebu Fighting Maroons, nga nagrepresentar sa Central Visayas (Region 7), milugwa nga kampiyon sa labing unang higayon sa men's basketball event sa 2025 State Colleges and Universities Athletic Association (SCUAA) National Games didto sa Camiguin Province.

Gilampornas sa Fighting Maroons ang ilang karibal gikan sa Western Visayas (Region 6), 75-52, sa final aron langkaton ang gihandum nilang gold medal niadtong weekend didto sa New Camiguin Gymnasium sud sa Pedro P. Romualdo Sports Complex sa Mambajao, Camiguin.

Ang makasaysayanong kadaogan nahimong mas espesyal alang ni UP Cebu head coach Rommel Rasmo gumikan kay mao kini ang una niyang titulo uban sa usa ka college team ug sa nasudnon pa gyud nga bantawan.

"Of course, it is a great feeling to win anything at the national level," matud pa ni Rasmo, ang labing daogan nga high school coach sa Cebu Schools Athletic Foundation, Inc. (CESAFI) human gitimon ang Sacred Heart School-Ateneo de Cebu (SHS-SdC) Magis Eagles ngadto sa league-record nga walo ka korona.

"Given that we literally started from the bottom, this is a testament to the players' hard work, commitment, and school pride," dugang pa niya.

Si Rasmo nagpasalamat sa tibuok komunidad sa UP Cebu ubos sa liderato ni Chancellor Atty. Leo Malagar ug Vice Chancellor Palmy Tudtud ingon man sa ilang team manager nga si Mark Leo Chang tungod sa hugtanon nilang suporta.

"This will not be possible without them. From the leaders of UP Cebu all the way to our school bus drivers and canteen staff, it was a complete team and community effort. This makes this first college title a little bit sweeter," dason pa ni Rasmo, nga giabagan sa iyang mga deputy coaches nga sila si Francis Auquico, Sai Bacalso ug Joboy Tuason.

Ang Fighting Maroons gilangkoban nilang Joshua Cabanlit, Raul Gilbuena, Aron Kress, Jayboy Ocampo, Matt Flores, Miguel Dosayla, Rafael Arradaza, Andrew Padilla, Harbi Cano, Brandon Sainz, Mel Ayuban, AJ de los Reyes, JZ Dizon,Abraham Letran, Mac Fernandez, Wenraye Sarol, Marco Manaloto ug Jules Garcia.