Soberano, laing walo ka Sugbuanon milampos sa makasaysayanong TCS London Marathon

CEBU, Philippines — Ang tinamod nga Sugbuanong businessman-sportsman nga si Jose Franco Soberano nangu sa usa ka grupo sa siyam ka runners gikan sa CS4 Running Club sa Sugbo nga malampusong nakahuman sa 2025 TCS London Marathon nga gipahigayon niadtong Abril 27 (Lunes, Abril 28 oras dinhi sa Pilipinas).

Ang Senior EVP ug COO sa Cebu Landmasters, Inc. giduyogan sa finish line sa iyang igsoon nga si Joby Soberano, Atty. Stephen Arong nga toa magbase sa Houston, Texas, Charles Ong sa Innoland, Nicole Ong sa Garden Gears and Landscapes, Steve Maniquis sa Golfers Hub Cebu, Thomas Yiu sa PGL Realty, Inc., Carlos Garcia sa Uppercuts, Inc. ug Kyle Kokseng sa Banilad Town Centre.

Tungod niini, nahimo silang kabahin sa kasaysayan kay ang ika-45 nga edisyon sa London Marathon mi-establisar man og bag-ong world record alang sa labing daghan nga finishers.

Sigun sa nagkadaiyang mga taho, ang gidaghanon sa mga runners nga nakahuman sa makutas nga 42.195 ka kilometro nga rota taliwala sa mainit nga kondisyon mibuak sa miaging marka nga 55,646 nga gikulit sa New York Marathon niadtong Nobiembre sa miaging  tuig.

Agi'g selebrasyon, mapasigarbuhon silang miposing uban ang bandila sa Philipinas didto sa London Bridge diin makita sa ilang luyo ang naban tog nga tower bridge.

Alang ni Soberano, ang pagtapos niya sa karera nahimong mas mahinungdanon gumikan kay duha ka lumba na lang ang iyang gikinahanglan aron maangkon na niya ang prestihiyosong Six Star Medal, nga gipaila-ila sa Abbott World Marathon Majors niadtong 2016 aron pagpasidungog sa mga runners nga makakumpleto sa unom sa labing dako ug inilang marathons sa tibuok kalibutan:Tokyo, Boston, London, Berlin, Chicago ug New York.

"The 2025 London Marathon is my 4th finish out of the 6 marathon majors. I feel blessed and thankful to have powered through, with the unusually warm weather greeting us on marathon day," suwat pa ni Soberano sa iyang Facebook.

"Tokyo and Boston, you’re next!" dugang pa ni Soberano diin ang gipasabot mao ang katapusang duha ka major marathons nga maghatud kaniya ngadto sa labing dako nga ganti ug dungog alang sa mga marathoners.