Thunder mi-sweep sa Grizzlies;Cavs nanoktok sa East semis

CEBU, Philippines — Si Shai Gilgeous-Alexander mikadlit og 38 puntos sa dihang gipatikangkang sa hingpit sa Oklahoma City Tunder ang Memphis Grizzlies, 117-115, aron pagkumpleto og dalayong 4-0 sweep sa ilang best-of-seven NBA Western Conference first-round playoff series kagahapong adlawa didto sa FedEx Forum sa Memphis, Tennessee.

Tungod niini, ang Thunder maoy unang team nga miabante sa ikaduhang hugna sa NBA playoffs.

Si Jalen Williams midugang og 23 puntos alang sa Thunder, nga nagkalisud batok sa Grizzlies bisan og wala si Ja Morant kay dunay bun-og sa hawak nga iyang nahiaguman sa Game 3.     Si Scotty Pippen Jr. mi-iskor og 30 puntos samtang sila si Santi Aldama ug Desmond Bane mitali og 23 puntos matag usa alang sa Grizzlies, nga nakagukod human mabiyai og 12 puntos sa katapusang 3:37 sa duwa apan waka makalahutay sa katapusan.

Sa laing bahin, ang Denver Nuggets mipakurat sa Los Angeles Clippers, 101-99, aron tablahon ang ilang serye sa baraha nga 2-2.

Si three-time MVP Nikola Jokic miharos og 36 puntos, 21 ka rebounds ug walo ka assists alang sa Nuggets, nga miabante og 22 puntos sa katapusang kuwarter apan ang Clippers mi-rally aron tablahon ang iskor, 99-99, sa follow-up shot ni Ivica Zubac.

Sa dihang kapin sa usa ka segundo na lang ang nahibilin, si Jokic miitsa og tres apan nasipyat kini. Ang teammate niyang Aaron Gordon maoy nakakuha sa rebound dayong hansak sa bola dungan sa pagtingog sa pinal buzzer.

Dugay kaayong gi-review sa mga opisyales ang maong eksena sa wala pa gideklara nga nasud gyud ang dunk ni Gordon sa wala pa mapupos ang oras.

Didto sa San Francisco, si Stephen Curry namawi sa mabugnaw niyang sinugdanan aron pagkolekta og 36 puntos, pito ka rebounds ug siyam ka assists sa dihang giugbok sa Golden State Warriors ang Houston Rockets, 104-93, aron pag-angkon og 2-1 nga labaw sa ilang serye.

Sa laing bahin, ang Cleveland Cavaliers nanoktok sa East semis uban ang 3-0 nga bentaha human gimasaker ang Miami Heat, 124-87.

Gidemolis sa Cavs ang Heat bisan pa og wala makaduwa ang All-Star guard nilang si Darius Garland ug si Donovan Mitchell nalimitahan ngadto lamang sa 13 puntos.

Salamat nilang Jarrett Allen ug De'Andre Hunter nga nagkumboya'g 43 puntos aron pangulohan ang eksplosibong opensa sa Cavs nga miresulta ngadto sa labing pait nga kapildihan sa Heat sa NBA playoffs.