39th SAC-SMB awards Jerusalem, amit gibayaw nga Athletes Of The Year

MANILA, Philippines —  Ang duha ka world champions nga sila si Melvin "El Gringo" Jerusalem (boxing) ug Rubilen "Bingkay" Amit (billiards) nagsawo sa dungog isip Athletes of the Year atol sa 39th Sportswriters Association of Cebu-San Miguel Beer (SAC-SMB) Cebu Sports Awards kagahapon (Sabado, Abril 26) didto sa Cube Wing sa SM Seaside City.

Ang labing karaan nga organisasyon sa media dinhi sa Sugbo motunol sa labing taas niining indibidwal nga pasidungog ngadto ni Jerusalem tungod sa mabungahon niining kampanya niadtong 2024 diin ang 31-anyos nga boksidor mikatkat og balik sa kalibutanhon niyang trono.

Human nalangkatan sa iyang World Boxing Organization (WBO) minimumweight belt sa dihang gipilde ni Oscar Collazo dul-an sa duha ka tuig na ang milabay, si Jerusalem nahimong world champion og usab human gipilde ang Hapon nga si Yudai Shigeoka pinaagi sa split decision aron sakmiton ang World Boxing Council (WBC) 105-pound title niadtong Marso 31 sa miaging tuig didto sa International Conference Hall sa Nagoya, Japan.

Sukad niadto, si Jerusalem milampos pagdepensa sa iyang korona sa WBC duha ka higayon. Una niyang gipukan ang Meksikanong si Luis "Flechita" Castillo pinaagi sa unanimous decision sa wala pa gidominar si Shigeoka sa ilang rematch duha ka bulan pa ang milabay didto sa Aichi Sky Expo sa Tokoname, Japan.

"Tumang kalipay ang akong gibati ug mapasalamaton kaayo ko sa SAC ning pasidungog nga ilang gihatag isip Athlete of the Year. Dako kaayo kining dungog ug garbo alang kanako ilabi kay nailhan ko ug nahimong world champion dinhi gyud sa Cebu," matud pa ni Jerusalem.

Sama ni Jerusalem, ang 43-anyos nga si Amit gibayaw sab sa halangdong bantawan sa kadungganan sa SAC.

Usa ka two-time world 10-ball champion, si Amit mihimo og kasaysayan isip labing unang Pinay nga bilyarista nga nahimong WPA Women's World 9-ball champion sa miaging tuig. Siya maoy ikaduhang Pinoy sunod ni Carlo Biado nga midaog sa parehong world 9-ball ug 10-ball championships.

Ang garbo sa dakbayan sa Mandaue nakakolekta sab og 10 ka gold medals uban ang lima ka silver ug usa ka bronze sa Southeast Asian (SEA) Games nga nagsemento sa iyang puwesto isip usa sa labing bangiitan nga mga atleta sa Philippine sports.

"To be given this recognition here in Cebu, my hometown, really means a lot to me. This is where it all started - the first time I held a cue, make a ball and eventually embrace the sport," dason pa ni Amit.