Timberwolves mimakmak sa Lakers

CEBU, Philippines — Gilubong sa Minnesota Timberwolves pinangunahan sa 25 puntos ni Jaden McDaniels ang koponan ni LeBron James ug Los Angeles Lakers 117-95 sa game one sa ilang NBA Western Conference playoff series.

Sa labing unang higayon, niduwa sab si Luka Doncic sa iyang post-season game kauban ang bag-o niyang team nga  Lakers human sa makakurat nga trade niadtong Pebrero, apan mipupo gihapon og 37 points. Samtang si James kinsa nagtinguhang makuha ang ikalima niyang titulo sud sa ika- 22 niyang NBA season, nakahipos sab og 19 puntos bisan pa man og nabutlog siya sa unang kwarter.

Apan bisan sa kombinasyon nilang Doncic ug James, wala nila maparangi ang Timberwolves bisan og nabiyaan nila og siete puntos sa unang kwarter. Kay sa ikaduhang kwarter daw giilogan og manobela ang Lakers hangtud nahuman ang duwa.

Si Naz Reid niiskor og 23 puntos gikan sa bench — inubanan sa iyang unom ka three-pointers nga nikulit sab sa pangalan sa franchise playoff-record sa Minnesota nga 21 three-pointers.

Samtang si Anthony Edwards nitampo sab og 22 puntos, walo ka rebounds ug siyam ka assists para sa ilang koponan.

Atol sa duwa, nisuway og gukod ang Lakers ug napagamay ang biya pinaagi sa ilang 10-0 run  sa ikatulong kwarter  88-71, pero tanang gihimo sa Lakers gitubag sab sa Timberwolves og ilang kaugalingong ratsada.

"I think we just came out ready to play," matud pang Edwards kinsa gitambagan iyang mga kauban nga kinahanglang andam sila sa kombate ini og sulod sa korte.

"Everybody's got to trust their work, trust themselves, and they did that tonight," matud pa niya.

Si Lakers coach JJ Redick miingon nga "mentally ready" gyud ang iyang team batok sa Timberwolves pero wala nila atbangi ang pisikal nga duwa sa Minnesota.

Ang Lakers mao lang ang home team nga napildi sa unang duwa sa first-round action.

Sa pikas bahin, si Nikola Jokic niiskor og 29 points ug Aaron Gordon nipuno sab og 25 aron aswaton ang Nuggets batok sa Los Angeles Clippers 112-110 nga niabot og overtime didto sa Denver.

Ang New York Knicks mipakaging sab sa Detroit Pistons sa ilang 21-0 scoring run  sa ilang  40-puntos nga nakolekta sa ikaupat nga kwarter sa pagkab-ot sa ilang 123-112 nga kadaugan diha sa Madison Square Garden. — IBM