29th Sunsport Basketball Training Camp mosikad na

CEBU, Philippines — Ang ika-29 nga edisyon sa tinuig nga Sunsport Basketball Training Camp sugdan na karong adlawa (Lunes, Abril 21) diha sa Sacred Heart Center Sports Club sa may dalan D. Jakosalem, dakbayan sa Sugbo. Modagan hangtud sa Mayo 9, ang training session ning developmental camp gitakda gikan sa Lunes hangtud sa Biyernes sa alas-9 ngadto sa alas-11 sa buntag.

Abli kini sa mga players nga nag-edad og siyete ngadto sa 19 anyos, babaye o lalaki nga buot makat-on ug bairon ang ilang abilidad as basketball. Sama sa miaging mga katuigan, ang beteranong coach ug tinamod nga skills trainer nga si Jojo Romarate-Teves mopaambit og mga drills nga haum sa panginahanglan ug tumong sa matag estudyante. Kini naglangkob sa ensaktong pamaagi sa pag-itsa, pagdribol, pagpasa, pagdepensa ug uban pa.

Ang rehistrasyon nagkantidad og P2,000 apil na niini ang bola ug jersey sa Sunsport. Gawas sa Cebu City, si coach Jojo mopahigayon sab og laing clinic didto sa Sunsport Basketball Training Center nga anaa mahimutang sa North Road National Highway sa eskena Basak ug Canduman, siyudad sa Mandaue. Ang Mandaue leg gi-iskedyul karong Abril 26, Mayo 3, 10 ug 17 sud sa tulo ka oras matag sesyon gikan sa alas-9 sa buntag hangtud sa alas-12 sa udto. P1,500 lamang ang rehistrasyon apil na niini ang bola ug training jersey. Alang sa dugang impormasyon, kadtong mga interesado mosalmot mahimong mokontak ni coach Jojo (0928-8295489) o sa buhatan sa Sunsport (345-1015).