Bryx Piala sayong natagak sa WBC Grand Prix
CEBU, Philippines — Si Bryx "The King" Piala sa ARQ Stable sa Sugbo sayong nanamilit sa labing unang World Boxing Council (WBC) Grand Prix didto sa BLVD City Global Theater sa Riyadh, Saudi Arabia ning bag-ohay pa lamang.
Kini human si Piala gipilde ni Tanzanian featherweight prospect Juma Choki pinaagi sa unanimous decision sa Round of 32 sa kalibutanhong torneyo.
Human sa unom ka hugna nga aksiyon, sila si judge Jun Bae Lim ug Juan Carlos Pelayo parehong mi-iskor og 59-55 samtang si Predrag Aleksic mitali og 58-56 tanan pabor ni Choki, nga miinat sa perpektong niyang rekord ngadto sa 10-0 uban ang 3KOs.
Ang 23-anyos nga si Piala natagak sa 9-3 uban ang 3KOs human nakatilaw sa ikaduha niyang sagunson nga pilde sa langyawng' lapyahan.
Sa miagi niyang away, si Piala gipatikangkang sa ikaupat nga hugna sa way pildeng Hapon nga knockout artist nga si Mikito Nakano (12-0, 11KOs) sa ilang Oriental and Pacific Boxing Federation (OPBF) featherweight title fight niadtong Septiembre 7, 2024 didto sa Korakuen Hall sa Tokyo, Japan.
- Latest
