26th Ornopia Cup Motocross Hisoler, bontuyan nangu sa mga mananaog

CEBU, Philippines — Sila si Renren Hisoler ug Jundie Bontuyan maoy nangu sa listahan sa mga mananaog sa malampuson nga 26th Ornopia Cup motocross race niadtong Domingo, Abril 13, didto sa MS Motosuit Motorsports Park sa Barangay Calambua, San Remigio amihanang bahin sa Sugbo.

Si Hisoler nanghawod sa expert open category dila sila si Bontuyan ug Cyril Tariman mipahiluna sa ikaduha ug ikatulong dapit.

Wala magpabitin si Bontuyan nga gibayaw nga double champion sa open enduro ug 125cc enduro.

Sama ni Bontuyan, si Warren Lauron misakmit sab og duha ka titulo.

Si Lauron midominar 250cc 18 Under division, samtang sila si Pawpaw Velasquez ug Keizer Ornopia mi-okupar sa sunod nga duha ka puwesto. Naghari sab siya sa novice open human giwani silang Velasquez ug Revin Pepito.

Nakamaneho hinooon si Velasquez paglangkat og tropeyo sa kampiyonato sa dihang iyang gilupig silang Titong Gabunas ug Julius Nadera sa 85cc open.

Sa laing bahin, si Shanyl Querol ang giyukboang rayna sa ladies open human siya mipatigbabaw batok nilang Jeanette Olanda ug RK Cuesta.

Sa elite 35 above, si Alejar Landero mibuntog nilang Brian Bontuyan ug Alles Gabunada aron labnihon ang korona.

Si Ricafort Ozzy naghari sa 65cc open sa dihang gipilde silang Lizel Reyes ug Jacey Olanda, nga duna say angay ikalipay kay nalandig sa unang dapit sa 50cc open ug gisundan nilang Zhakey Nadera ug Zeth Quijada.

Mikuha og atensiyon si Tomtom Largoza human nakampiyon sa beginners open ingon man si Rizen Querol nga miangkon sa unang puwesto sa ladies 14 Under.

Ang ubang mananaog sa usa ka adlaw nga lumba nga giorganisa ni MS Motosuit big boss Lou Ornopia isip kabahin sa selebrayon sa tinuig nga pista sa Calambua agi'g pahinungod sa minahal nilan patron nga si San Vicente Ferrer mao sila si Aston Jagdon (local norte), JC Limutan (underbone), Ayen Ledesma (executive 40-44 and 45-49), Siegfred Ornopia (executive 50 above) ug Ryan Ouano (wild thing).