Central Visayas nalangkatan sa ilang korona sa PRISAA
CEBU, Philippines — Ang Central Visayas (Region 7) gipapahawa sa ilang trono isip overall champion sa SOCCSKSARGEN (Region 12) sa Senior division sa bag-ohay pang natapos nga Private Schools Athletic Association (PRISAA) National Games 2025 didto sa Tuguegarao City, Cagayan Province.
Human sa usa ka semanang kompetisyon, ang Central Visayas natagak sa ikaduhang puwesto sa final standings uban ang kinatibuk-ang 276 ka medalya nga gibahin bahin ngadto sa 115 ka golds, 62 ka silver ug 99 ka bronze.
Ang mga delegado sa Region 7 gilupig sa SOCCSKSARGEN, nga naglangkob sa South Cotabato, Saranggani, Sultan Kudarat ug General Santos City, nga maoy milangkat sa korona sa kampiyonato bitbit ang 128 ka golds nga gidayan-dayanan og 100 ka silver ug 55 ka bronze.
Ang CALABARZON (Region 4-A) mipahiluna sa ikatulong dapit uban ang 74-56-55 gold-silver-bronze tally ug gisundan kini sa Cordillera Autonomous Region (CAR) ug Western Visayas (Region 6) nga mitapos nga ikaupat ug ikalima uban ang 46-42-41 ug 39-84-84 nga nakabkab nilang medalya.
Naglangkob sa Top 10 ang Negros Island Region (20-27-56), Davao Region (17-16-17), Bicol Region (15-21-71), Ilocos Region (14-16-26) ug Cagayan Valley (10-19-29). Sa Youth category, ang Central Visayas nahimutang sa ikaupat nga dapit uban ang 68-24-30 medal count sunod sa overall champion Western Visayas (99-71-73), CALABARZON (94-55-51) ug Bicol Region (80-97-85).
- Latest
