Celtics mikulit og NBA record

CEBU, Philippines —  Ang Boston Celtics nakaangkon og tipik sa kasaysayan sa NBA human sila mikulit og bag-ong rekord alang sa labing daghan nga 3-pointers sa usa ka season.

Gibuak sa defending champion ang karaang marka sa Golden State Warriors nga 1,363 ka tres niadtong  2022-2023 season human sila miposa og dugang 14 ka tres atol sa 123-103 nilang pagpasaop sa Phoenix Suns kagahapon didto sa TD Garden sa Boston, Massachusetts.

Sa kinatibuk-an, ang Celtics aduna nay 1,370 ka tres ning season. Si Jaylen Brown maoy nangu sa Celtics uban ang 31 puntos samtang si Jayson Tatum midugang og 23 puntos.

Sa laing bahin, ang Golden State Warriors mipaduol sa pagsilyo og awtomatik nga luna sa playoffs human gipakaging ang Denver Nuggers, 118-104.

Wala gihapon mihupas ang kainit ni Stephen Curry nga mipatuasik og 36 puntos alang sa Warriors, nga ikalima karon sa Western Conference bitbit ang 46-31 nga baraha.

Nagkahayag sab ang tsansa sa Lakers nga moderesto sa playoffs human giihaw ang New Orleans Pelicans, 124-108.

Ang "Big 3" nga gilangkoban nilang LeBron James, Luka Doncic ug Austin Reaves nagkumboya'g 92 puntos alang sa Lakers, nga nagpabilin sa ikatulong dapit sa West uban ang 47-30 rekord.

Didto sa San Antonio, ang Cleveland Cavaliers nanoktok sa numero unong luna sa East human sila nakaipsot sa Spurs, 114-113.

Samtang ang Detroit Pistons hingpit nang nakalukat og ticket sa East playoffs human gipaluhod ang Toronto Raptors, 117-105.