Curry, Tatum misidlak sa NBA All-Star Game
Mituboy sa Team Shaq ngadto sa kadaogan
CEBU, Philippines — Sila si Stephen Curry ug Jayson Tatum nagkumbinar og 27 puntos aron pangulohan ang Team Shaq ni Shaquille O'Neal ngadto sa tam-is nga kalamposan sa 74th NBA All-Star Game kagahapong adlawa didto sa Chase Center sa San Francisco, California.
Komportable kaayo ang alas sa Golden State Warriors nga miwadwad sa iyang abilidad didto sa ilang balwarti diin siya milansang sa nakatatak na niyang makapakurat nga mga 3-pointers.
Inabagan sa bitoon sa Celtics nga si Tatum, ang Team Shaq misutoy ngadto sa 41-25 nga kadaogan batok sa Team Chuck ni Charles Barkley.
"It's a celebration of a lot of great things -- to be able to play with these guys for as long as we have," matud pa ni Curry, nga mikadlit og 12 puntos, upat ka rebounds, duha ka steals ug usa ka assist sa final. Sa una nilang duwa, mihipos siya og otso puntos, unom ka rebounds, usa ka steal ug usa ka assist.
"It's our responsibility to come out and put on a show and I thank them for helping me do that," dugang pa ni Curry nga miyukbo sa iyang mga teammates.
Si Tatum mikolekta og 15 puntos alang sa Team Shaq nga mibandera sab nilang Kevin Durant, Damian Lillard ug James Harden.
Ang sayon kaayong duha ka kamot nga pahansak sa bola ni Tatum maoy nagsilyo sa daog sa Team Shaq ubos sa bag-ong All-Star format diin ang team nga unang makaabot og 40 puntos mao ideklara nga mananaog.
Ang Team Shaq mipayaka sa Team Chuck bisan og si LeBron James kalit lang mi-atras sa duwa kay dunay gihambin nga angol sa iyang tiil ug kiting.
Apan bisa'g wala ang 40-anyos nga si James, ang Team Shaq mao kanunay ang nagkontrola sa duwa batok sa mga bangiitan sab nilang kontra nga naglangkob nilang Nikola Jokic, Shai Gilgeous-Alexander ug Donovan Mitchell.
- Latest
