Gilas gikulata sa Egypt

CEBU, Philippines — Ang Gilas Pilipinas mitapos sa ilang kampanya sa 2nd Doha Invitational Cup nga pildero.

Kini human ang Gilas gilampaso sa Egypt Pharaohs, 86-55, sayo kagahapon sa buntag didto sa Qatar University Sports and Events Complex.

Naglabaw pa unta ang Gilas og usa ka lugas, 19-18, human sa nag-unang 12 minutos sa duwa apan wala na sila makabawi pa sa dihang gipabuthan sa Pharaohs og 21-9 nga bomba sa ikaduhang kuwarter.

Ang mas dagko ug mas hait og tinirahan nga Pharaos wala na molingi pa human milansang og 39-28 nga bentaha sa halftime.

Padayon nga gidominar sa Egypt ang Gilas sa second half dayon na ngadto sa pagposte og 31 puntos nga demolisyon.

Si Justine Brownlee mihipos og 18 puntos ug lima ka rebounds apan wala nay laing Pinoy nga naka-iskor og double figures.

Gihuman sa Gilas ang tulo ka adlaw nga torneyo bitbit ang 1-2 rekord.

Sa wala pa gilampornas sa Egypt, ang Gilas gikastigo sa Lebanon, 75-54.

Naangkon sa Gilas ang bugtong nilang daog batok sa host Qatar, 72-69.

Human sa Doha, ang Gilas ni coach Tim Cone molarga sab dayon padung sa Chinese Taipei alang sa ikatulo ug katapusang window sa FIBA Asia Cup qualifiers.