NBA All-Star: Coach Jeff Codera mapasigarbuhon sa laing maanindot nga kasinatian

CEBU, Philippines — Ang notadong Sugbuanong basketball coach ug skills trainer nga si Jeff Codera mapasirgarbuhon ug malipayon sa lain na sab nga mahinungdanon niyang kasinatian sa NBA All-Star ning tuiga didto sa San Francisco, California.

Si Codera, nga miyembro sa Golden State Warriors training camp sud sa usa na ka dekada, nakigduyog  sa usa ka pundok sa mga coaches ug skills trainers nga mipaambit sa ilang abilidad ngadto sa 1,500 ka batan-ong players didto sa Bay Area pinaagi sa serye sa Jr. NBA/Jr. WNBA clinics nga kabahin sa 2025 NBA All-Star weekend.

Usa ka lisensiyadong Gold coach sa USA Basketball ubos sa Youth Development Program niini, si Codera mitambong sab sa mandatory seminar alang sa mga coaches nga nakapalapad sa iyang nakat-onan.

Dugang niini, nahimamat sa 43-anyos nga si Codera ang pipila ka mga NBA Rising Stars nga sila si Victor Wembanyama sa San Antonio Spurs, Zach Edey sa Memphis Grizzlies, Ausar Thompson sa Detroit Pistons ug Moses Moody ug Brandin Podziemski sa Golden State Warriors.

Nakahalubilo sab niya sila si kanhi NBA champion Shawn Marion ug three-time Sixth Man of the Year Jamal Crawford.

"I am so happy to be part of such a special event once again. It's truly gratifying and fulfilling," matud pa ni Codera, lumad gikan sa Tabok, dakbayan sa Mandaue apan toa na karon nagpuyo sa lungsod sa Tabuelan amihanang bahin sa Sugbo.

Ang NBA All-Star 2025 motak-op pinaagi sa gikahinaman nga All-Star Game karong adlawa (Lunes, Pebrero 17 oras dinhi sa Pilipinas didto sa Chase Center arena.