Mainit nga kasaulogan UV nag-bonfire alang sa CESAFI 3-peat champ Green Lancers

CEBU, Philippines — Usa ka espesyal nga selebrasyon alang sa usa ka espesyal nga kalamposan.

Ang University of the Visayas nagselebrar sa "three-peat" sa Green Lancers ug sa makasaysayanong korona sa Baby Lancers sa Cebu Schools Athletic Foundation, Inc. (CESAFI)Season 24 piaagi sa usa ka bonfire atubangan sa mapasalamaton nga komunidad sa mga Visayanians niadtong Huybes sa gabii, Pebrero 13, diha UV-Main Campus.

Ubos sa paggiya ni head coach Gary Cortes, ang Green Lancers misakmit sa ikatulo nilang sagunson nga titulo sa CESAFI college basketball sa miaging tuig. Sa kinatibuk-an, duha na ka Grand Slam ang nadaog ni Cortes kon unom ka kampiyonato sud sa walo ka sunod-sunod niyang pagtikang sa Finals sukad siya gitudlo nga coach sa Lancers niadtong 2015.

"First time to nako naka-experience og bonfire," matud pa niCortes. "Lingaw and honored mi nga at least gihatagan og bili ang among kadaogan. The presence sa amo mga boss, admin and students around the UV quadrangle made the event more special. Nakapadasig gyud sa team to do and perform more."

"It was a memorable night for all of us. Full of gratitude for the acknowledgement of our accomplishments in the basketball field, paambit pa ni Lances team captain Jimpaul Amistoso.

Sa laing bahin, ang Baby Lancers ubos sa pagtimon nilang coach Jun Pepito ug coach Ronaldo Bucao mikulit sa ilang pangan sa bato isip labing unang Under 15 champion sa CESAFI.

Hapit unta makarehistro og rekord nga tripleng bulawan ang Lancers apan mipahiluna lamang sila sa ikaduhang dapit sa juniors division.

Ang mga kadagkuan sa tunghaan nga gipangulohan nilang UV Executive Board Chairman Gerald Anthony "Didi" Gullas, Vice Chairman Joselito "Jiji" Gullas, Treasurer Dr. Leopold Gullas-Lucero, Board of Trustees Jose Miguel "J-Mi" Gullas ug Vince Lucero, ug Lancers team manager Eduardo "Digul" Gullas III maoy nangu pagdagkot sa bonfire kauban silang UV President Dr. Conrado Iñigo Jr., Vice President for Finance and Quality Management System Dr. Rosemarie Cruz-Español, VP for Academic Affairs Dr. Anna Lou Cabuenas ug VP for Administration Elmer Ocaba.

Giduyogan sila nilang Student Affairs and Services Center (SASC) Director Dr. Anna Katrina Oaminal-Watin, Athletic Director Dr. Chris Mejarito ug ang mga nagkadaiyang deans, directors, academic heads, principals, student body, ug pipila ka mga ginikanan.

Atol sa mahinungdanong okasyon, gipasidunggan sab sa UV ang mga kampiyon nilang atleta ingon man coaches sa lawn tennis, karatedo, scrabble ug beach volley.