Tatum misidlak, Celtics mipatukay-ang sa Spurs

CEBU, Philippines — Si Jayson Tatum mikadlit og 32 puntos, 14 ka rebounds ug pito ka assists aron ituboy ang defending champion Boston Celtics ngadto sa 116-103 nga pagpatikangkang sa San Antonio Spurs sa NBA kagahapong adlawa didto sa TD Garden sa Boston, Massachusetts.

Mangtas kaayo ang Celtics nga mipabuto og 37 puntos sa unang kuwarter ug miinat sa ilang labaw ngadto sa 24 puntos dayon na ngadto sa pagposte og 66-47 nga bentaha sa halftime.

Si Kristaps Porzingis mipupo og 29 puntos samtang si Derrick White midugang og 19 puntos alang sa Celtics nga milansang sa ikatulo nilang daog ug ikapito sa kinatibuk-an sa miagi nilang walo ka duwa.

Si De'Aaron Fox, nga nabira sa Spurs gikan sa Sacramento Kings atol sa trade deadline, maoy nangu sa Spurs uban ang 23 puntos. Si Victor Wembanyama mihipos og  17 puntos ug 13 ka rebounds sa pilderong kawsa.

Didto sa Toronto, si Donovan Mitchell nangu sa pito ka Cleveland players nga mireshitro og double figures sa dihang gipaksit sa Cavaliers ang Raptors, 131-108.

Samtang ang lider sa Western Conference nga Oklahoma City Thunder dalayong mibangon human malubong og 21 puntos aron pahagbaon ang Miami Heat, 115-101.

Si Shai Gilgeous-Alexander mibubo og 14 sa iyang 32 puntos sa katapusang kuwarter diin ang Thunder mirapido og 24 ka sunod-sunod nga puntos aron pabugnawon ang Heat.

Didto sa New York, si Jalen Brunson mipasud sa krusyal niyang itsa sa nahibilin nga 11.3 segundos sa overtime aron aswaton ang Knicks ngadto sa 149-148 nga kadaogan batok sa Atlanta Hawks.

Si Karl-Anthony Towns mipupo og 44 puntos ug 10 ka rebounds samtang si Brunson mitampo og 36 puntos ug walo ka assists sa dihang gipakgang sa Knicks ang tuko ka sagunson nga daog sa Hawks.

Sa laing bahin, ang Indiana Pacers nanginahanglan pa og overtime sa wala pa pioga ang nangiwit nga Washington Wizards, 134-130.

Si Obi Toppin mikulit og 31 puntos ug 10 ka rebounds samtang si Bennedict Mathurin mitampo og 28 puntos alang sa Pacers.

Sa laing resulta, ang Milwaukee Bucks mipahilom sa Minnesota Timberwolves, 103-101, bisan og wala ang duha nila ka mga bitoon nga sila si Giannis Antetokounmpo ug Damian Lillard.