Dobleng kalbaryo alang sa  Meralco

CEBU, Philippines — Napakyas ang Meralco Bolts sa ilang misyon nga maka-angkon og luna sa Final Four sa East Asia Super League (EASL) Home and Away Season 2.

Kini human sila nakahiagum og makabuak sa dughan nga kapildihan sa mga kamot sa New Taipei Kings, 106-96, sa kulbahinam ug makutas nilang engkwentro nga milanat og duha ka overtime niadtong Miyerkules sa gabii didto sa University of Taipei.

Pait kaayo ang natilawan nga kaparotan sa Meralco ilabi kay naglabaw unta sila og nuybe puntos sa pinal nga siyete minutos sa regulasyon.

Nanalimit sila uban ang 2-4 rekord.

Tungod niini, nadoble ang kalbaryo sa Meralco tungod kay natagak sila sa EASL tulo ka adlaw pa lamang ang milabay sukad sila gipalagpot sa Barangay Ginebra, 94-87, sa tinagakay nga Game 3 sa ilang quarterfinals series sa PBA Commissioner's Cup.

Imbes nga Meralco, ang New Taipei maoy miabante sa EASL semifinals isip No.2 seed sa Group B bitbit nga 4-2 nga baraha. Naglingkod sa unang dapit ang Ryukyu Golden Kings.

Sa Group A, ang Hiroshima Dragonflies ug Taoyuan Pilots maoy mi-okupar sa nag-unang duha ka puwesto.

Ang EASL semis duwaon karong Marso 7-9 didto sa Macau.