Spurs miihaw sa Bucks

CEBU, Philippines —  Si Victor Wembanyama mipatuasik og 30 puntos sa dihang gilampornas sa San Antonio Spurs  ang Milwaukee Bucks, 144-118, sa NBA kagahapong adlawa didto sa Frost Bank Center sa San Antonio, Texas.

Ang higanteng sentro gikan sa France milangkat sab og 14 ka rebounds ug unom ka blocks samtang mipasud og lima ka 3-pointers aron tabangan ang Spurs ngadto sa impresibo nilang 26 puntos nga demolisyon sa Bucks.

Si Keldon Johnson mitali og 24 puntos, si Stephon Castle mi-iskor og 20 samtang si Harrison Barnes midugang og 16 puntos alang sa Spurs.

Si Giannis Antetokounmpo mipaulbo og 35 puntos samtang si Damian Lillard mihipos og 22 puntos apan wala mosaler ang maanindot nilang salida sa Bucks.

Sa laing duwa, si Nikola Jokic mikuha og atensiyon sa dihang ang Denver Nuggets nakasugakod sa 42 puntos nga eksplosyon ni Tyrese Maxey aron bughaon ang Philadelphia 76ers, 137-134.

Ang garbo sa Serbia mipupo og 28 puntos, 13 ka assists ug siyam ka rebounds apan ang walo niya ka sagunson nga puntos sa ngahinapos nga bahin sa katapusang kuwarter maoy nakasalbar sa Nuggets.

Dako sab og naambag sila si Jamal Murray ug Michael Porter Jr. nga nagkumbinar og 55 puntos alang sa Nuggets, nga nagpabilin sa ikaupaty nga puwesto sa Western Conference bitbit ang 29-19 rekord.

Didto sa New Orleans, si Jayson Tatum mipasud sa iyang jump shot sa nahibilin nga 0.2 segundos aron aswaton ang Boston Celtics ngadto sa 118-116 nga kadaogan batok sa Pelicans.

 Si Tatum mitapos uban ang 27 puntos, samtang si Jaylen Brown mibomba og puntos alang sa Celtics.