Khalifa Cup:NBTC Cebu Qualifiers kasado na

CEBU, Philippines — Unom ka teams ang magpinaksitay sa korte sa gikahinaman nga Khalifa Cup:National Basketball Training Center (NBTC) Cebu Local Qualifying Tournament nga gikatakda karong Disiembre 14-15 didto sa Recoletos Coliseum sa University of San Jose-Recoletos (USJ-R) Basak Campus.

Si NBTC Cebu LQT Commissioner Atty. Francis Tolibas nagkanayon nga naglangkob sa mga mopakita'g aksiyon ning duha ka adlaw nga torneyo mao ang USJ-R Baby Jaguars, University of Southern Philippines Foundation (USPF) Baby Panthers, ug University of San Carlos (USC) Baby Warriors gikan sa Cebu Schools Athletic Foundation, Inc. (CESAFI).

Makigsangka sila batok sa Abellana National School (ANS) Chiefs, San Roque College de Cebu Hounds,  ug Don Celestino Martinez Sr. Taytayan Integrated School sa Bogo City.

Matud pa ni Tolibas nga ang Top 2 sa Cebu LQT makadawat og P150,000 nga ayuda matag usa sa dihang mokumbati sila sa NBTC Visayas Regional Championship 2025 karong Pebrero 12-16 didto sa Bacolod Tay Tung High School gym sa Bacolod City.

Ang Team Khalifa, ang reigning NBTC Cebu ug Visayas regional champion, giimbita aron mosalmot sa Regionals didto sa City of Smiles duha ka bulan gikan karon.

Sama sa miaging mga katuigan, ang mga regional champions gikan sa Visayas, Mindanao ug North ug South Luzon moabante sa NBTC National Finals didto sa Mall of Asia Arena sa Pasay City unya sa Marso 2025 diin ilang makaharong ang mga magduduwa gikan sa Global Talent ID, wildcard qualifiers, ug nag-unang mga koponan sa UAAP ug NCAA.