LeBron midimdim sa labing tam-is niyang kalamposan
CEBU, Philippines — Si LeBron James namahayag nga ang ikatulo niyang gold medal maoy labing nindot sa tanan niyang mga kadaogan sa Olympics.
Ang all-time leading scorer sa NBA dako og natampo sa dihang gibugha sa US ang host France, 98-87, aron sakmiton ang ikalima nilang sagunson nga men's basketball gold sa prestihiyosong torneyo nga mahitabo kausa lamang sud sa upat ka tuig.
Sa iyang pagbalik sa Olympics human mipalta og 12 ka tuig, ang Los Angeles Lakers superstar mipupo og 14 puntos, 10 ka rebounds ug unom ka assists aron tabangan ang mga Amerikano pagpatikangkang sa France sa kulbahinam nilang kampiyonato.
"It's a big moment for USA basketball," buhagay pa ni James.
"I'm just living in the moment. I feel super humbled that I can still play this game and play it at a high level, play with 11 other great players, and a great coaching staff go out and do it for our country," padayon pa sa four-time NBA champion.
Mao kadto ang ikaduhang sunod-sunod nga higayon nga gipayaka sa US ang France sa Olympic final.
Ning higayona, si James mibalik sa team samtang si Stephen Curry mipakita'g aksiyon sa unang higayon.
"It was great. I think you wouldn't want it any other way to be able to face off against the host team. It was a great atmosphere," dason pa ni James.
Ang 39-anyos nga si James nakadaog og bronze sa dihang teenager pa lamang siya niadtong 2004 Athens Olympics.
Upat ka tuig ang milabay, nahimo siyang kabahin sa "Redeem Team" nga milangkat sa gold medal sa 2008 Beijing Games.
Mikumbati siya og usab sa London 2012 apan wala na miduwa sukad niadto.
"It's the best one because it's the one that's right now," batbat pa ni James, nga daw sa nagparamdam nga mao na kini ang katapusan niyang Olympics.
"I can't see myself playing in LA (in 2028). Although I also didn't see myself playing in Paris. But four years from now, I can't see it," dugang pa niya.
- Latest
