Team USA mipalagpot sa Brazil, makigsangka sa Serbia sa semis

CEBU, Philippines — Ang US team mitagak sa Brazil, 122-87, aron pag-angkon og luna sa basketball semifinal sa Paris Olympics 2024 diin ilang sangkaon ang Serbia samtang ang host France miabante sab sa Final Four diin ilang banggaon ang World Cup champion Germany.

Sila si Devin Booker ug Anthony Edwards nagkumboya'g 35 puntos aron pangulogan ang unom ka US players nga mitali og double figures.

Apil na niini si LeBron James, nga mipupo og 12 puntos, siyam ka assits, tulo ka rebounds ug three ka steals sa wala pa mobiya sa sayong bahin sa ikatulong kuwarter human wala tuyoa nga nasikhan ang iyang mata.

Si Anthony Davis mi-iskor og 13 samtang si Kevin Durant miamot og 11 puntos alang sa mga Amerikano nga naglaraw sa ikaupat nilang sagunson nga gold medal. Sa semis, ilang harongon ang Serbia, nga nagmilagro human malubong og 24 puntos aron paglagpoton ang Australia, 95-90, sa overtime.

Ang reigning NBA MVP nga si Nikola Jokic maoy nangu sa Serbia uban ang 21 puntos, 14 ka rebounds, ug walo ka assists, samtang si Bogdan Bogdanovic midugang og 17 puntos.

Sa laing akaiyon, ang France mipatikyaob sa kanhi way pildeng Canada, 82-73, samtang ang Germany mipayaka sa Greece, 76-63.