AC Troopers naghari sa Balamban Fiesta Cup

CEBU, Philippines — Ang AC Troopers/Eversure/Hype-Pro Cebu milampornas sa Good Shepherd-Toledo City, 108-81, aron sakmiton ang kampiyonato sa Balamban Fiesta Cup 2023 Inter-Commercial Basketball Tournament niadtong Miyerkules sa gabii didto sa Mayor Exasperanza S. Binghay Memorial Cultural Center sa Balamban, Cebu.

Human sa sikit kaayong kumbati sa first half diin ang Good Shepherd-Toledo naglabaw pa gani og usa ka lugas, 50-49, ang AC Troopers kalit lang nga nagmangtas ug milusad  og nagkayong 34-13 rally aron pagposte niini og dakong 83-63 nga labaw padung ngadto sa katapusang kuwarter. Ang AC Troopers nakasustinir sa ilang kainit aron pagrehistro og 27 puntos nga demolisyon.

Ang tadhang guard nga si John Abad maoy bida sa AC Troopers human miposa og pito sa siyam niya ka 3-pointers dayon na ngadto sa pagkadlit og 21 puntos uban ang lima ka rebounds ug walo ka assists.

Si Tansiong Bonganciso miamot og 19 puntos, si Miguel Minguito mi-iskor og  17, samtang sila si Patrick Cabahug, Charles Pepito, ug Eman Calo midugang og 11 puntos matag usa alang sa AC Troopers nga mibulsa og P150,000 nga premyo sa paglangkat nila sa titulo. Si Reed Juntilla,  nga mitimbre og 10 puntos ug upat ka assists alang sa AC Troopers, maoy gibayaw nga MVP sa liga. Giduyogan siya s aMythical Five nilang Cabahug, Pepito, RJ Dinolan, ug Nino Batiquin.

Si RJ Dinolan mihipos og double-double nga 21 puntos ug 13 ka rebounds samtang sila si  Ryan Alicaway ug Ehman Suarez nagkumboya'g 30 puntos apan nakawang ang ilang paningkamot sa habig sa Good Shepherd-Toledo. Duna hinoon gihapon sila'y angayan nga ikahimuot kay nakadawat man sila og P100,000.

Sa sayo pa, si James Ferraren mipupo og 19 puntos, siyam ka rebounds ug upat ka assists samtang sila si Joseph Cabahug ug Tristan Albina nagkumbinar og 31 puntos sa dihang gipakaging sa EGS-Talisay City ang Tuburan 360 Coffee, 90-84, aron pagpahiluna sa ikatulong dapit.