Sotto moduwa gihapon sa Gilas Pilipinas

CEBU, Philippines — Subling giklaro ni Kai Sotto ang mga nanggawas nga estoryang dili siya makaduwa sa Gilas Pilipinas sa umaabot nga FIBA World Cup diin ang Pilipinas co-host kauban sa Japan ug Indonesia karong tuiga.

Si Sotto miingon nga ang iyang paningkamot pagpalambo sa iyang dinuwaan sa basketball tungod kini sa iyang damgo nga makasulod sa NBA ug makaduwa ubos sa Bandila sa Pilipinas sa mga international tournaments. “I’ve never said no to playing for my country ‘coz that’s my dream since I started playing basketball,” matud pang Sotto  sa Power & Play program sa One PH nga gi-host ni kanhi PBA commissioner Noli Eala.

“My top two dreams are to make it to the NBA and represent the national team,” dugang pa ni Sotto.

Giklaro niya kini human dunay migawas og mga pagdudang dili kini moapil sa umaabot nga Gilas buildup games sa Uropa ug China karong semanaha nga kabahin sa pagpangandam sa Pilipinas sa umaabot nga FIBA World Cup.

Kahinumdoman nga bag-ohay lang nakabalik si Kai gikan sa mini-camp nga gipasiugdahan sa Utah Jazz didto sa US. Ang maong mini-camp usa sa pamaagi ni Kai nga mapilian og NBA team sa umaabot nga draft.

“I’ve been representing my country since I was 14 years old. I don’t get what other people are saying about me not wanting to join (Gilas) blah, blah blah. I’m trying not to listen to it and just focusing on the now,” dugang pa sa 7.3 nga higanteng si Kai.

Matud pa niya ang iyang agent nga si Tony Ronzone sa Wasserman mao nay bahalang makigestorya sa Samahang Basketbol ng Pilipinas bahin sa iyang planong pagsuot og balik sa Gilas Pilipinas jerseys karong tuiga.

Si AJ Edu, kauban ni Sotto sa dihang sila nagduwa pa sa Gilas Youth nibalik na sa Pilipinas alang sa Gilas. Ang Gilas naapil sa Group A ug makaatbang nila sa unang hugna o elimination round ang Dominican Republic, Angola ug Italy. Gitinguha sa Gilas nga makaabante pa sa second round ug kun swertihon makaabot sa sunod pang rounds aron mapiliping top Asian team nga maghatag sab kanila og dalan aron makasulod sa umaabot nga Paris Olympics.