Pinoy para-athletes miarangkada  sa 12th ASEAN Para Games

CEBU, Philippines —  Nakuha sa Pilipinas ang labing una niining Silver medal sa men’s 3x3 basketball team sa 12th ASEAN Para Games nga opisyal nga nagsugod niadto lang Biyernes sa gabii didto sa Morodok Techo National Park sa Phnom Penh sa Cambodia.

Pisikal ang dinuwaan sa mga Thai nga kaatbang sa mga Pinoy cagers nga silang — Alfie Cabanog, Kenneth Tapia ug Clifford Trocino — ug bisan giunsa nila paninguha naglisod sila pagpugong sa pikas koponan 15-7 nga kaparutan diha sa Elephant Hall A.

“Dinouble team nila ako. Physical sila maglaro, binangga pa nga ako sa likod,” matud pa sa 31- anyos nga si Cabanog nga lumad nga taga North Cotabato. Si Cabanog naputlan og tiil dul-an usa ka dekada na ang nilabay atol sa pakiggubat didto sa Basilan.

Ang maong medalya maoy labing una nga nakuha sa Pilipinas alang sa usa ka semanang kompetisyon. Ikatulo na nila kini nga silver human nila nakuha ang samang medalya sa Surakarta, Indonesia sa miaging tuig ug sa Manila niadtong tuig 2005. Sa sayo pa sab, nakuha sa women’s squad ang bronze apan napakyas sila pagabante pa sa dihang napukan sila sa Laos 8-5.

Sa laing duwang chess nga gihimo sa Royal University, gitambakan dayon sa mga Filipino chess masters ang ilang mga kaatbang sa tinguhang mausab ang paghakot nila og 10 ka bulawang medalya sa Surakarta sa miaging tuig, diin upat niini kortesiya ni Sander Severino.  Si Severino, nga usa ka FIDE Master midispatsar dayon sa duha niya ka nakatbang nga sila si Malaysian Ahmad Nazmi Md Nizam ug Indonesian nga si Alfrets Dien sa men’s PI class aron makapundo og dos puntos kauban ang kababayang si Jasper Rom ug Indonesian nga si Maksum Firdaus.

Wala say tatsa  human sa duha duha rounds nga duwa silang Darry Bernardo ug Menandro Redor nga parehong leading sa men’s B2/B3 section kauban ang laing Indonesian nga si Gayuh Satrio, samtang si Cheyzer Mendoza usa sa tulo ka mga babaye sa women’s PI division leaders nakahipos sab og perpekto dos puntos.

Silang Francis Ching ug Yadi Sopiyan sa Indonesia nagtunga sab sa ikaupat nga pwesto pinaagi sa ilang 1.5 points men’s B1 bracket.

“So far, so good,” matud pang national chess team coach James Infiesto kinsa malaumong ang iyang mga batos maoy modiktar unya sa kampanya pinaagi sa paghakot og bulawang medalya sa suds a unom ka rapid rounds nga matapos karong adlawa.

Ang standard chess gikatakdang himuon ugmang adlawa Lunes, Martes ug Miyerkules samtang ang blitz himuong karong Huwebes.

Gawas sa basketball ug chess, mokombate sab sa us aka semanang duwa ang mga Pinoy para-athletes sa   track and field, swimming, sitting volleyball, badminton ug powerlifting.

Si paralympic bronze medalist Adeline Dumapong Ancheta ug Paralympian Achelle Guion maoy magdala sa Bandila sa Pilipinas sa powerlifting squad nga naglangkob nilang Marydol Pamati-an, Romeo Tayawa, Rose Ann Lita, Jules Empizo, Denesia Esnara, Cherrylyn Sugue, Jeffrey Jaramillo, Carlo John Nuyda ug Gregorio Payat Jr. Si Ancheta, 49, gipaabot nga mobawi aron mabawi ang titulong rayna sa maong sport dinhi sa rehiyon human siya nakakuha lang og silver medal sa nakalabay nga tuig.

"All of us came here prepared. We are determined to win, we will do our best," matud pa niya.— Gikan sa Philstar.com