NBA Champion coach Vogel maoy modala sa renda sa Suns

CEBU, Philippines —  Gipahibalo na sa Phoenix Suns nga si NBA champion coach Frank Vogel  mao na ang ilang bag-ong head coach hulip kang Monty Williams.  Ang 49-anyos nga si Vogel nahimong coach kaniadto sa Indiana Pacers, Orlando Magic ug  Los Angeles Lakers sa iyang karera. Karon nga naa na siya sa Suns, paningkamotan niyang makatilaw og NBA championship trophy ang 55-anyos nga koponan.

Si Vogel maoy nagdala sa Lakers aron makuha ang NBA title niadtong 2020 atol sa gipatumang  Florida bubble. Ang career record ni Vogel 431-389 sud sa  11 seasons ug  49-39 mark sa playoffs.

Niadtong Mayor 13, gipalagpot sa Phoenix si Williams bisan sa upat ka malampusong seasons nga siyay head coach apil niini ang ilang NBA Finals appearance sa 2021 ug nakadawat og coach of the year award sa 2022. Apan matud pa di makalimtan sa management sa Suns ang duha nila ka makauuwaw nga  sagunsong kapildihan nga nakapatagak kanila sa playoffs—usa niini dihang sila gitambakan og 30 puntos diha mismo sa ilang tugkaran atol sa elimination games.

Sa sinugdanan, daghang gipiliang ipuli kang Williams nga naglakip nilang assistant coach Kevin Young ug mga dagkong pangalan nga silang Nick Nurse ug Doc Rivers. Apan nadesisyon nga si Vogel maoy haom sa koponan tungod sa pagkailado niining maayo sa depensa. Apil sa mga superstar players nga iyang nahuptan si LeBron James.

Ang bag-ong tagiya sa Suns nga si Mat Ishbia todo suporta sa paghimo og mga kausaban sukad nga iyang naangkon ang franchise niadtong bulan sa Pebrero, apil niini ang pagkuha sa 13-time All-Star nga si Kevin Durant sa gihimong trade deadline deal.  Apan bisan paman niini natagak gihapon ang Suns sa second round sa playoffs batok sa karon NBA Finals 2023 contender Denver Nuggets.

Pinaagi sa mga kausabang gihimo ubos sa pamunoan ni Ishbia ug karon Vogel, malaumon ang koponan og malampusong sunod nga season inabagan nilang Durant ug sa 3-time All-star nga si Booker. —IBM