Nuggets nakauna

CEBU, Philippines —  Ensakto sa pahuway ug napuno sa enerhiya, gidominar sa Denver Nuggets ang Miami Heat, 104-93, sa pasiunang duwa sa ilang best-of-seven NBA Finals kagahapon didto sa Ball Arena sa Denver, Colorado.

Si two-time MVP Nikola Jokic miwadwad na sab og triple-double uban ang 27 puntos, 10 ka rebounds ug 14 ka assists alang sa Nuggets, nga nagmangtas gikan sa pagsugod ug sa usa ka higayon naglabaw og 24 puntos sa ikatulong kuwarter.

Wala sab magpabitin si Jamal Murray nga midugang og 26 puntos, 10 ka assists ug unom ka rebounds alang sa Nuggets nga 2-0 ang tirada sa ilang pag-host sa Game 2 karong Lunes.

Sila si Jokic ug Murray nahimo nga ikaduha pa lamang nga teammates nga mihipos og dili mominus 25 puntos ug 10 ka assists matag usa sa NBA Finals sunod nilang Magic Johnson ug James Worthy sa LA Lakers niadtong 1987.

"We just wanted to get the first punch," komento pa ni Jokic kabahin sa impresino nilang pagpayaka sa Heat. "In the first three rounds they won their first game when they traveled on the road and we didn't want to have that to happen. I think we did a good job."

Si Bam Adebayo maoy nangu sa Heat bitbit ang 26 puntos. Sila si Gabe Vincent ug Haywood Highsmith nagkumboya'g 37 puntos apan ang alas nilang si Jimmy Butler naposasan ngadto lamang sa 13 puntos.

Ang Heat nalubong og 21 puntos human sa tulo ka kuwarter ug igo lamang sila nakasikit ngadto sa nuybe puntos human sa tres sa Highsmith sa pinal nga 2:34 sa aksiyon.

Dali nga nabalik sa Nuggets ang dako nilang labaw pinaagi nilang Jokic, Kentavious Caldwell-Pope ug Aaron Gordon nga gikahimuot og maayo sa 19,528 ka fans nga mi-abiba kanila.

"Everybody contributed," dason pa ni Jokic. "It's a great win for us."

Si Gordon mi-iskor og 12 sa iyang 16 puntos sa unang kuwarter nga sayong nakapasilaob sa opensa sa Nuggets. Sa ikaduhang kuwarter, si Murray na ang mibirada pinaagi sa pagbubo og 10 puntos.

Samtang ang Heat bugnaw ang sinugdanan ug mipasud lamang og unom sa 26 nila ka tira sa nag-unang 12 minutos.

"They are in a pretty good rhythm, especially in that first half," dason pa ni Heat coach Erik Spoelstra. "Our disposition, the multiple efforts, the resolve in the second half was much   better.

"But you get to this level, it has to be complete games of that kind of disposition," duhang pa ni coach Spo.

Mismo si Butler ang misaludo sa gipakitang katakos sa Nuggets pagpanalipod sa ilang korte dungan ang pasalig nga mamawi sila sa sunod nilang panag-abot.

"They did their job on their home floor, you have to say that," batbat pa ni Butler. "But we will be ready. We will adjust, and we will do some things very differently and come out here and be ready to give more for game two."