Giyera karon sa Boston Heat, Celtics magtiwas

CEBU, Philippines — Usa ka dakong giyera sud sa korte ang moulbo didto sa Boston karong adlawa gumikan kay ang Celtics ug ang Miami Heat magtiwas sa tinagakay nga Game 7 sa ilang NBA Eastern Conference finals.

Nanuktok na unta sa pultahan sa NBA Finals ang Heat human gisagunsonan og pilde ang Celtics sa nag-unang tulo ka duwa sa serye.

Sa kasaysayan sa liga, wala pay team nga nakadaog sa usa ka serye human malubong og 3-0.

Apan ang Celtics miposisyon sa ilang kaugalingon nga mohimo og kasaysayan human ilang gipayaka ang Heat sud sa tulo sab ka sunod-sunod nga higayon aron tablahon ang serye, 3-3.

Human nagmilagro sa Game 6 luyo sa buzzer-beater ni Derrick White, misamot og kataas ang kompiyansa sa Celtics gumikan kay adto man duwaon sa ilang balwarti ang katapusang hunat sa mainiton nilang panagkaribal sa Heat.

Samtang way duda nga ang presyur adto na mahan-ok sa Heat nga manulong sa teritoryo sa ilang kaaway sa labing krusyal nilang duwa ning season.

Masaligon hinoon si Heat coach Erik Spoelstra nga makalingkawas ang iyang mga batos sa dakong hagit nga nag-atang kanila sa unahan ilabi na kay anad naa kaayo sila niining maong sitwasyon.

Kahinumduman nga ang Heat gipilde sa Atlanta Hawks sa una nilang play-in game sa wala pa nila gibalian og sungay ang Chicago Bulls aron pag-abante sa playoffs isip eighth seed sa East.

Gitagak dayon sa Heat ang top-seeded Milwaukee Bucks sa wala pa gipalagpot ang New York Knicks aron pagtikang  sa East finals batok sa Celtics.

Ang malisud nilang kaagi maoy gikuhaan og kusog ni Spoesltra.

"When we say we did it the hard way, there were some bone-crushing losses where we did the right things, and then last-second shots, just for the wins against us," matud pa ni Spoelstra, nga nakampiyon duha na ka higayon uban sa Heat.

"The competitive spirit of this group, we are never to be denied. Even after games like that, we would always come back the next game and find a way to get a win. That's what we have to do right now," dugang pa ni Spoelstra.

Aron makab-ot sa Heat ang ilang gitinguha, gikinahanglan sab hinoon nga ang alas nilang si Jimmy Butler mabalik sa hait niyang porma sama sa iyang gipakita sa sayong bahin sa serye.

Sa iyang bahin, ang pambato sa Celtics nga si Jayson Tatum nagkanayon nga dili pa sila angay magselebrar human sa makapakurat nilang kadaogan sa Game 6 gumikan kay duna pa silay mas dako nga trabahoon.

Miangkon si Tatum nga malisud nga tahas ang ilang sagubangon gumikan kay seguradong makigpatay sab ang Heat aron makataak sa NBA Finals diin ang Denver Nuggets nagpaabot.

"We're all aware it's not time to celebrate," dason pa ni Tatum. "We didn't accomplish anything. We won a big game that we had to win in incredible fashion. We're proud of the way we played, proud of the way we figured it out."

"But the job is far from finished. (Miami) is a great team, really well-coached team, and we've got to be ready. It's not over. Both teams want this extremely -- like to the highest degree. They want it. We want it. The guys are competing on both ends, giving everything they have. You like being a part of series and games like that. It brings the best out of you. It's going to be tough on for sure," panapos pa ni Tatum.