Jerusalem napakyas sa labing unang depensa

CEBU, Philippines — Napakyas ang Pinoy'ng kampiyon nga si Melvin "El Gringo" Jerusalem sa una niyang pagdepensa sa iyang WBO miniumumweight title.

Nahitabo kini sa una pa gyud niya nga away didto sa Amerika.

Kini human si Jerusalem gipa-undang sa ikapitong hugna ni Oscar Collazo sa Puerto Rico kagahapon didto sa Fantasy Springs Casino sa Indio, California.

Si Collazo mihimo og kasaysayan isip labing paspas nga Puerto Rican world champion sud lamang sa pito ka away.

Nindot unta ang gipakitang sinugdanan ni Jerusalem nga maoy midiktar sa ilang kumbati sa nag-unang tulo ka hugna.

Apan human si Collazo mikonektar og mga suntok ngadto sa ulo ug tiyan ni Jerusalem sa ikaupat nga hugna sa kalit lang nausab ang inawayan ni Jerusalem nga nagsige na og atras ug nagdumili na pagrita og balik sa iyang kontra.

Nagpadayon ang pag-ataki ni Collazo batok ni Jerusalem nga daw sa nahudtan na og lana sa ikalimang hugna.

Og sa ikaunom nga hugna, hayag nang pildero si Jerusalem diin si reperi Ray Corona nagpaabot na lamang sa ensaktong panahon aron undangon ang away.

Bisan tuod og si Jerusalem naningkamot nga pabiling magbarog taliwala sa bagsik nga opensiba ni Collazo, klaro kaayong wala na siyay ikabuga.

Sa dihang gipangutana sa iyang trainer nga si Michael Domingo kon gusto pa ba niyang mopadayon, si Jerusalem milingo-lingo sa iyang ulo timaan sa pagsurender niini.

Tungod niini, si Jerusalem nalangkatan sa korona nga iyang nasakmit human gipatikangkang ang Hapon nga si Masataka Taniguchi niadtong Enero 6 didto sa Japan. Mao pa lamang kadto ang ikatulo niyang pilde sud sa 23 ka away uban ang 12KOs.

Luyo sa kapakyasan ni Jerusalem, si Marlon Tapales nag-inusara na lang karon isip world boxing champion sa Pilipinas.