Celtics mipayaka na sab sa Heat
CEBU, Philippines — Ang Boston Celtics mipauwan og 16 ka 3-pointers sa dihang giusban nila og parot ang Miami Heat, 110-97, sa Game 5 sa ilang best-of-seven NBA Eastern Conference finals kagahapon didto sa TD Garden sa Boston Massachusetts.
Alkansi gihapon sa serye ang Celtics apan ang nakanindot kay ilang giputol ang labaw sa Heat ngadto na lang sa 3-2.
Duna hinooy laing tsansa ang Heat nga patikangkangon sa hingpit ang Celtics sa Game 6 nga mobalik didto sa ilang korte karong Domingo.
Apan angayan nga magmatngon ang Heat gumikan kay nadungagan ang kadasig sa Celtics nga mohimo og kasaysayan isip labing unang team sa NBA nga nakabangon human malubong og 3-0 sa usa ka serye.
"The only thing that can stop us is us," matud pa ni Celtics forward Jaylen Brown.
Upat ka mga starters sa Celtics ang mikadlit og dili mominus 20 puntos ubos sa pagpangu ni Derrick White nga miposa og unom ka tres sa iyang 24 puntos.
"Got some good looks and was able to knock them down, and just kind of rolled with it," dason pa ni White.
Si Marcus Smart midugang og 23 puntos ug lima ka steals samtang sila si Brown ug Jayson Tatum miamot og 21 puntos matag usa.
Hugot kaayo ang depensa sa Celtics hinungdan nga ilang gipuwersa ang Heat ngadto sa 16 ka turnovers. Gikan sa mga sipyat sa Heat, ang Celtics nakamugna og 27 puntos.
"Tonight we were the tougher playing team," kanayon pa ni Brown. "We set the tone from start to finish." Timaan niini, wala na paginhawaa pa sa Celtics ang Heat sukad sila misutoy ngadto sa sayong 23-7 nga labaw.
Sa habig sa Heat, namugnaw ang alas nilang si Jimmy Butler nga mitapos lamang uban ang 14 puntos, nga maoy labing gamay niyang puntos sa playoffs.
Si Duncan Robinson maoy nangu sa Heat bitbit ang 18 puntos samtang si Bam Adebayo mihipos og 16 puntos sa pilderong kawsa.
- Latest
