Makuyawan nga magbuwag

Dear Tito Miguel,

Ako diay si  Adrian, taga Banawa,Guadalupe, Cebu City. Pito ka tuig na ang relasyon namo ni Jen. Imbes ma- happy ko, mura man ko og maguol uy ug sige ko og overthink. Kasagaran man gud sa pito na katuig kay naa na sa critical stage. Unsaon pagbaton og peace of mind? — Adrian

Adrian,

Natural ra ang maguol unsay mahitabo sa inyong relasyon. Buot pasabot seryoso ka. Apan dili na maayo kun wala na ka mahimutang tungod sa imong gikahadlokan. Aron ka magmalinawon, dawata ang kamatuoran nga dili ka makapugong unsay sunod mahitabo sa kinabuhi, kun mausab imong uyab, mohupas iyang gugma o dili ba kaha makakita’g lain unya biyaan ka. Sakit kun mahitabo, pero gamita kini nga sukod kun asa taman iyang gugma kanimo. Kun dili siya makalahutay, buot pasabot dili siya ang para nimo, basin gani wala’y gugma sa sugod pa lang. Mao nay siguroha, kun gihigugma ba sad ka, dili kay kun unsa na mo kadugaya.

Apan samtang wala pa nahitabo, ayaw paulipon sa imong gikahadlokan, mao nay mohikaw sa imong kalipay. Inay nga mag-una imong hunahuna, ipakita kaniya unsa katiunay imong gugma. Kun biyaan gihapon ka, dili na nimo mabasol imong kaugalingon. Wala kay kakuwangan, siya ang nasobrahan.

Dili nimo kaaway imong uyab, ang imong kontra kanang sige’g tikaw -tikaw sa imong hunahuna, mga pangagpas nga layo ra sa kamaturoan. Gani, posible pa ikaw ang mobuhat sa imong gikahadlokan.

Wala’y garantiya sa kinabuhi, sugal ang tanan labi na sa relasyon. Kadaghan nagdayon apan nagbuwag gihapon. Apan daghan sad nagmalamposon. Mao nay nakapahinam-hinam sa kinabuhi, dili nimo matag-an unsa imong maani. Kay kun masiguro pa nimo ang tanan, ang paninguha’g pangandam karon dili na unta nimo angay buhaton. —Tito Miguel

Magpatambag ka? Ipada kang Tito Miguel: 0998-581-5856