Dili makigkita ang uyab

Dear Tito Miguel,

Naa koy uyab, ning tuig mi pagka petsa 19 sa Abril. Ako siya gihagad nga magkita  mi, pero nibalibad siya nga dili. Unsa may akong buhaton,  Tito Miguel? Ako diay si Melven, nag edad ko og 35 anyos. Tambagi  please, Tito Miguel. Salamat daan,  Tito Miguel. — Melven

Melven,

Wala nimo giklaro unsa mo nga klase nga uyab, virtual lang ba o personal. Mura’g virtual kay usa na mo ka tuig diha pa nimo siya gihagad magkita.  Ang problema kay nibalibad siya. Usa ray buot pasabot ana, dili siya interesado kanimo. Laliman ka’g usa ka tuig na mo nag-chat o video call ba kaha, apan iyang palabyon ang higayon nga magkita na mo sa personal.

Kun tinud-anay pa ang iyang gibati kanimo, dili unta siya mobalibad, kun mahimo pa gani molupad padulong kanimo. Apan tingali mangutana ka, kun dili siya interesado ngano nagdugay man mo?Mao bitaw nagdugay mo kay dili siya seryoso. Lagmit para niya duwa ra ang tanan, posible gani naa pa siya’y lain nga ka-chat. Tingali sakitan ka sa maong mga posibilidad. Apan yuna ra, nahigugma ba gyud ka? Dili kaha igo ra ka naghinam-hinam niya? Dili pa kana gugma, sama niya, nagduwa-duwa ra mong duha. Tingali gikilig lang mo sa paghinam-hinam ug pagdahom sa mga posibilidad nga unsa kaha kun magdayon na mong duha. Lagmit masulob-on lang ka kay nag-inusara ka. Apan dili lang ang uyab ang makalipay nimo. Naa pa kay mga higala o pamilya ug imong kaugalingon mismo.

Puwede sad ka mangatarungan nga lahi ra gyud ang uyab. Tinuod, apan dili sa paagi ngano nagkauyab mong duha. Ngano gud tawon mosalig ka’g mahigugma sa tawo nga wala pa nimo makita? Dawata nga dili siya interesado kanimo, apan usba imong diskarte, ayaw pahigot sa virtual reality.   — Tito Miguel

Magpatambag ka? Ipada kang Tito Miguel: 0998-581-5856