BSA mibira'g duha ka korona sa AAU BBallshootout

CEBU, Philippines — Padayong misidlak ang mga koponan sa Basketball Sports Alliance (BSA) human misakmit og duha ka titulo sa 2023 AAU BBallshootout March Madness Tune-up 1 & 2 Basketball Championships didto sa Newark Academy sa Livingston, New Jersey ning bag-ohay pa lamang.

Sa 14 Under age group, ang BSA mikadlit og dalaygong three-peat human gibuntog ang Brooklyn USA-Steele, 58-53.

Sila si Nathaniel Fernando ug Edrey Bay ang mibida sa BSA hinungdan nga ilang gisaw-an pasidungog isip Most Valuable Players.

Ang ubang mga sakop sa BSA U14 grandslam champion mao sila si Leon Villavicencio, Derek Mayuga, Azar Villanueva, Engel Tampus, Sebastian Eman, Samuel Paquiz, Signechrist  Sumalpong, Dominic Ruiz, ug Jolian Gomes. Ang ilang team manager mao si Reah Fernando.

Sa laing bahin, ang mga pambato sa BSA midominar sa Brooklyn USA-Griffith, 37-15, aron birahon ang labing una nilang korona sa 12 Under category.

Sila si Nicholas Fernando ug Darrell Mayuga maoy gipasidunggan nga co-MVP. Ang ilang mga kauban mao sila si Julian Villavicencio, Zayden Ricanor, Kyle Chan, Nathan Umali, Aiden Sanchez, Aiden Ajero, MJ Ramirez, Joseph Yee, ug Jake Castillo. Ang ilang team manager mao si  Jane Chan.

Ang BSA U12 ug U14 teams ubos sa paggiya sa mga Sugbuanong coaches nga sila si Rhoel Gomez, Bembem Alcaraz ug Eugene Tampus uban nilang Elmer Remon, Victor Villegas ug Sam Eman.

Gitukod nilang Remon ug Villegas niadtong 2012, ang BSA nagtinguha nga tudloan ug barion ang abilidad sa mga batan-ong Fil-Am ballers nga namgambisyon maapil sa varsity teams sa ilang mga tunghaan ug ingon man andamon sila sa nagkadaiyang mga kompetisyon sa umaabot.