Mga dekalibreng masters mokumbati sa 2nd Hector Ginete Chess championships
CEBU, Philippines — Sila si International Masters Joel Pimentel, Rico Mascarinas, ug Kim Steven Yap maoy nangu sa listahan sa mga hait nge entrante sa 2nd Hector Ginete Chess Championships nga gikatakda karong Abril 1-2 didto sa Cebu Chess Hub sa SM Seaside City.
Gipaabot nga mohatag sa tulo ka IMs og dakong hagit sila si National Master Merben Roque, Richard Natividad, Allan Pason, Rommel ug Ronald Ganzon, Bonn Rainauld Tibod, ug Joel Pacuribot.
Lain pang mga lig-ong kandidato nga mobira sa titulo sila si Venancio Loyola Jr., Christopher Tubalado, Joselito Loquez, ug Bhell Ortiz.
Kapin na sa 50 ka players ang nagparehistro ning duha ka adlaw nga torneyo nga gipasiugdahan ni US-based Cebuano chess patron Hector Ginete, ang No.1 varsity player sa University of San Carlos (USC)-North Campus sa iyang panahon sa elementarya ug sekondarya.
"Malipayon kaayo ko nga daghan ang mi-support sa ako tournament ilabi na kay nakakuha kini og atensiyon sa mga top players sa Cebu. Gusto ra gyud ko nga mopaluyo sa Cebu chess kung asa ko nagsugod," paaambit pa ni Ginete.
Ang top 10 qualifiers human sa lima ka hugna nga eliminasyon karong Sabado, Abril 1, mo-abante sa championship round sa sunod nga adlaw.
Ang top 10 finishers makadawat og ganting salapi. Duna say insentibo ang top 3 kiddies (13-under) ingon man ang top lady ug senior performers.
- Latest
