Hawks midagit sa Cavs

CEBU, Philippines —  Si Dejounte Murray milansang og tulo ka krusyal nga free throws sa pinal nga 2:14 sa duwa ug dayon mipasud sa iyang fall-away jumper sa hilimatyong segundos aron aswaton ang Atlanta Hawks ngadto sa 120-118 nga kadaogan batok sa Cleveland Cavaliers sa NBA kagahapon didto sa State Farm Arena sa Atlanta, Georgia.

Sa kinatibuk-an, si Murray mipupo og 29 puntos samtang si Onyeka Okongwu midugang og season-high 21 puntos alang sa Hawks nga pabiling nagtabla ug ang Toronto Raptors sa ikawalong dapit sa Eastern Conference.

Laing nabulahan sa daog sa Hawks mao ang Milwaukee Bucks nga ilang gitabangan pagsilyo sa Central Division title.

 Didto sa San Francisco, si Stephen Curry miposa og walo ka tres sa iyang 39 puntos uban ang walo ka rebounds ug walo sab ka assists samtang si Jordan Poole miamot og 21 puntos sa dihang gibalhiboan sa Golden State Warriors ang New Orleans Pelicans, 120-109.

Wala sab magpa-alkansi si Klay Thompson nga mibomba og lima ka 3-pointers sa iyang 17 puntos alang sa Warriors, nga mipakgang sa lima ka sagunson nga daog sa Pelicans.

Sa laing aksiyon, si Desmond Bane mi-iskor og 31 puntos sa dihang gipakaging sa Memphis Grizzlies ang Orlando Magic, 113-108.

Mikuha sab og atensiyon si P.J. Washington nga mibubo og 22 sa iyang career-high 43 puntos sa katapusang kuwarter sa dihang gibuntog sa Charlotte Hornets ang Oklahoma City Thunder, 137-134, alang sa ikatulo nilang sunod-sunod nga daog.

Samtang si Kristaps Porzingis miwadwad og 32 puntos ug 13 ka rebounds sa dihang gipahayagan sa Washington Wizards ang nipis kaayo nilang paglaum nga maka-abante sa playoffs human gibihag ang Boston Celtics, 130-111.