CEPBA mikadlit sa ikawalong daog
CEBU, Philippines — Ang CEPBA mipayaka sa Spit On Them, 85-71, sa Hoop Nation Developmental League (HNDL)-Sunday Night Hoops Season 2 nga gipaluyohan sa Sunsport didto sa City Sports Club-Cebu gym.
Si Jacob Gaviola mihipos og 15 puntos, upat ka rebounds ug usa ka block alang sa CEPBA nga nagsolo na karon sa liderato sa North Division uban ang 8-1 win-loss record.
Ang Spit On Them natagak sa ikaupat nga dapit bitbit ang 5-3 nga marka.
Sa ubang mga resulta, ang Central Blockers mipiog sa Unknown, 50-47, samtang ang Metro Ayala 2 mipakurat sa kanhi way pildeng Project Hoops, 75-67.
Si Ronald Eulo mitali og 12 puntos, unom ka rebounds, ug usa ka steal sa dihang gitabla sa Central Blockers ang ilang rekord ngadto sa 5-5 samtang si Ronald Aragon mipupo og 15 puntos, lima ka rebounds ug tulo ka assists alang sa Metro Ayala 2 nga miinat sa ilang baraha ngadto sa 5-4.
Ang Unknown nahagsa sa 3-4 samtang ang Project Hoops naparot sa unang higayon human makasagunson og pito ka daog.
- Latest
