CEBU, Philippines — Nakakuha og inspirasyon gikan sa malampuson nga Ironman 70.3 Davao ning bag-ohay pa lamang, ang kagamhanan sa dakbayan sa Dapitan nga gipangulohan ni mayor Seth Frederick "Bullet" Jalosjos misaad nga mopresenta og usa ka lumba nga dili mahikalimtan sa dihang sila na maoy mo-host ning prestihiyosong event unom ka bulan gikan karon.
Si Jalosjos mitunob sa igosoon nilang dakbayan niadtong weekend aron obserbahan ang pagpadagan sa Ironman 70.3 Davao. Personal niyang gipanglista ang angayan nilang mga buhatonon aron pagseguro nga ang labing una nilang pagpahigayon sa Ironman 5150 Triathlon hapsay ug mabungahon unya sa Septiembre 10.
Ang Ironman nailhan sa taas kaayo niining standard pagpasiugda og mga karera sa triathlon sa tibuok kalibutan ug gustong pamatud-an sa "Shrine City of the Philippines" nga angayan silang maapil sa kalendaryo niini sa 2023.
Sa maong katuyoan, gidala ni Jalosjos uban kaniya ang iyang mga department heads ug uban pang mahinungdanong mga opisyal nga may kalambigitan sa pag-organisa sa 5150 Triathlon Dapitan aron estudyohan unsay mga gipanghibuhat sa Davao sa ingon ila kining masunod.
“All my department heads are with us and all the key people in key offices," matud pa ni Jalosjos. “We are here mirroring the event and mirroring the departments in-charge of the Ironman 70.3 Davao to ensure that we won’t get lost. It’s gonna be our first time!” Jalosjos said.
Gusto ni Jalosjos nga katapusang kalihukan sa Ironman didto sa Mindanao magmabulokon sama sa nahitabo sa una niining lumba didto sa Davao.
“After Davao, Dapitan is the only one in Mindanao (to host an Ironman race) so we are hoping to make the event very memorable,” added Jalosjos.
Pinaagi niining maong kalihukan, ang Dapitan naglaraw sab nga masabwag sa tibuok kalibutan kon unsay ikadalit sa ilang dapit nga namongingi og maanindot nga mga talan-awon gawas nga abunda sa kultura ug kasaysayan.
"Mayor Seth wants nothing but the best to both promote and market Dapitan City through the holding of world-class events to lure international tourists to come here as participants. The mayor is a multi-sport athlete himself and he wants to make sure Dapitan will prepare thoroughly and give the participants representing each of their countries a competition to remember," batbat pa ni Dapitan Tourism Officer Apple Marie Agolong.