Unang season sa OCCCI D-League malampuson

SJC-Maasin, WLC-Ormoc, Baybay 1 CS gikoronahang mga kampiyon

CEBU, Philippines — Sigun sa ilang gihandum gikan sa sinugdanan, ang OCCCI D-League nakatagamtam og naglagiting nga kalamposan sa labing una niining paglawig nga natapos pinaagi sa koronasyon sa tulo ka mga kampiyon sa ilang Inter-School Basketball Tournament Season 1:Battle of the Best niadtong Domingo,  Marso 26, didto sa Ormoc Superdome sa Ormoc City.

Sa labing unang higayon sa kasaysayan sa paugnat sa kusog sa Eastern Visayas, ang mga batan-ong baskebolista gikan sa elementarya hangtud sa collegiate level nahatagan og plataporma aron mapasundayag ang ilang abilidad sa mas dako ug lapad nga bantawan pinaagi sa usa ka organisadong liga.

Salamat sa dalaygon nga inisyatiba sa OCCCI, nga  nangusog og maayo aron kahatagan ang mga Leyteno ballers og tsansa nga mabaid og maayo ang ilang abilidad ug ingon man hagdanan aron makatkat ang ilang mga pangandoy sa kinabuhi.

"Mas sobra pa sa among gi-forecast ang amo na-accomplish," matud pa ni OCCCI chief finance officer Arvin Villena. "There were challenges along the way but thankfully we were able to pull it off."

"And it's very fulfilling because the league is not only for OCCCI but also for the players, the parents, the schools, the community, the local government unit, and the sponsors who are part of its success," padayon pa ni Villena.

Si OCCCI chief operating officer Mizpah Taala mipabuhagay og susamang sentimento.

"Wala mi mag-expect nga ingon ani ka-positive and response sa mga schools," dason pa ni Taala. "Dugay nami gasuporta og mga liga but kaning opportunity nga gihatag namo karon sa mga batan-ong players mas dako na nga level mao nang malipayon kaayo mi nga naka-help in nurturing their dreams."

Sa Battle of the Best, ang St. Joseph's College (SJC) Green Hawks sa Maasin City nakaipsot sa Western Leyte College (WLC)-Ormoc Mustangs, 75-71, sa kulbahinam nilang final match aron paglugwa nga kampiyon sa college division.

Si C-Jay Gonzales, nga produkto sa grassroots program sa Sisters of Mary  School-Boystown sa Minglanilla, Cebu, maoy mibida sa SJC-Maasin uban ang 16 puntos aron pagbira sa Finals Most Valuable Player award. Gipaluyohan siya ni Sammy Arandia uban ang 14 puntos ug Joshua Jumbo Gonzales nga mipupo og 12 puntos ug 12 sab ka rebounds.

Labaw lamang og usa ka lugas, 72-71, ang Green Hawks mipasud og tulo ka free throws  sa pinal nga 19.4 segundos aron silyohan ang makutas nilang daog.

Duna hinoon gihapoy angayan nga ikalipay ang WLC Mustangs gumikan kay ang manghud nilang katropa midemolis sa Ormoc City Senior High School, 70-54, aron sakmiton ang titulo sa  high school level.

Si Christian Rile Veloso mikolekta og 15 puntos, unom ka rebounds ug upat ka blocks alang sa Mustangs nga nagtukmod kaniya aron mamahimong Finals MVP.

Sa elementary category, ang Baybay 1 Central School nakalingkawas batok sa San Juan ES, 46-42, aron langkaton ang korona.

Ang kaluhang Loreto nga sila si Dan Ryl ug Dar Nyl misidlak nga labing hayag sa Baybay 1 CS human nagkumbinar og 27 puntos, 30 ka rebounds, upat ka assists, walo ka steals, ug lima ka blocks. Si Dar Nyl Loreto, nga mitapos uban ang  double-double nga 17 puntos ug 18 ka rebounds maoy gipasidunggan nga Finals MVP.