Bucks, Lakers namawi

CEBU, Philippines —  Ang Milwaukee Bucks ug ang Los Angeles Lakers dali nga nakabawi sa miagi nilang makabuak sa dughan nga kapildihan.

Lab-as pang gipahagba sa Indiana Pacers, ang Bucks nakabangon dayon ug gipahimungtan sa ilang kayugot ang Toronto Raptors, 118-111, ubos sa pagpangu nilang Giannis Antetokounmpo ug Brook Lopez. Si Lopez mibubo og 17 sa iyang 26 puntos sa katapusang kuwarter nga nahimong taytayan sa Bucks sa dalaygon niining pagbalitok.

Wala sab magpabitin si Antetokounmpo nga mirehistro og triple-double uban ang 22 puntos, 13 ka rebounds ug 10 ka assists alang sa Bucks nga padayong naghari sa liderato bitbit ang 51-20 rekord.

Sa laing bahin, si Austin Reaves mipabuhagay og career-high 35 puntos aron salbaron ang Lakers ngadto sa makutas nga daog, 111-105, batok sa Orlando Magic. Daw naibtan og tunok sa ilang dughan ang Lakers, nga niadto lamang Sabado gipukan sa Dallas Mavericks og usa lamang ka lugas, 111-110.

Tungod niini, dako na og puruhan ang Lakers nga makaapil sa play-in alang sa giatngan nga NBA playoffs.

Didto sa Portland, ang Trail Blazers gipayaka sa LA Clippers, 117-102, luyo sa paningkamot nilang Paul George ug Kawhi Leonard nga nagkumbinar og 53 puntos.

Sa laing mga duwa, si Shai Gilgeous-Alexander mipabuto og 40 puntos sa dihang gibihag sa Oklahoma City Thunder ang Phoenix Suns, 124-120, samtang si Nikola Jokic mikolekta og 22 puntos, 17 ka rebounds ug 10 ka assists alang sa ika-28 niyang triple-double ning season nga nagtuboy sa Denver Nuggets ngadto sa 108-102 nga pagpakaging sa Brooklyn Nets.